اقوام متحدہ۔ 16جون (اے پی پی) اقوام متحدہ اوغانستان نا صوبہ ننگرہار اٹی پولیو تورمہم نا ٹیم آ مروک آ سلہہ بند جلہو اٹی 5ہیلتھ ورکرآتا کسفنگ نا ترندی اٹ مذمت ءِ کرسا پارینے کہ داوڑنا غیرکانودی بیدادی ءِ دمدستی وڑاٹ توننگ نا گرج ءِ۔ اوغانستان اٹی اقوام متحدہ نا ریذیڈنٹ اینڈ ہیومینیٹیرین کوآرڈنیٹر رمیز الاکبروف تدوک آ دے تینا ٹویٹ اٹی پارے کہ او دا سلہہ بند جلہو اٹی مروک آ مرک آتیا سخت صدمہ ٹی ءِ و چناتے دراخ جوڑ زند آن محروم کننگ غیر انسانی ءُ کاریم اسے ہرادے نئے بیرہ دمدستی وڑاٹ توننگ نا گرج ءِ بلکن جلہو اٹی اوار بندغ آتا برخلاف جاست وپاست بایدے مرے و زموار آتے اوفتے اوفتا کروک نا سزاتننگے۔ اوپارے کہ اقوام متحدہ ہرجاگہ غا ہیلتھ ورکرزآتیا مروک آ غٹ جلہو آتا ترندی اٹ مذمت ءِ کیک و ہیلتھ ورکرآتیا جلہو چناتیا جلہو ءِ ہراڑآ چناتا جان جوڑ زند انا دارومدار ءِ۔ یات سلے کہ اوغانستان اٹی پولیو تور مہم نا بنا دوشنبے نادے آن مسوسس ہراڑکن 5سال اسکان نا وئی نا اسہ کروڑ چناتے پولیو آن بچفنگ نا پڑی کنفنگ نا ہدف ءِ مقرر کننگاسس ولے پولیو تور مہم نا ارٹ میکو دے پولیو ٹیم آ سلہہ بند جلہو اٹی 5ورکرزوال و 4ٹھپی مسر۔
