جدہ۔ 15جون (اے پی پی) سعودی عرب کن چین نا سفارتکار چن ویکنگ اسلامی کمکار تنظیم(اوآئی سی) ٹی چین انا اولیکو نمائندہ تعینات مسنے۔ چینی خبررساں ادارہ نا رداٹ اسلامی کمکار تنظیم (اوآئی سی) نا سیکرٹری جنرل یوسف بن احمد العثیمین چینی نمائندہ نا تعیناتی نا باضابطہ نوٹیفکیشن ءِ جاری کرسا کورونا نا دین اٹی اسلامی ملک آک خاص وڑاٹ نیزگار ملک آتا کمک و کمکاری ءِ کننگ آ چین نا منت واری ءِ ہرفسا زور شاغاکہ اوآئی سی چین اتون تعلقداری تے مون آ دیک۔ چینی خبررساں ادارہ نا رداٹ اوپارے کہ کورونا دین اٹی دامشکل وخت اٹی اسلامی ملک آک خاص وڑاٹ نیزگار ملک آتا کمک ءِ کننگ آ چین نا کوشست آک ستاکڑزرہ۔ داوخت آ سعودی عرب کن چینی نا سفارتکار چن ویکنگ پارے کہ ساڑی آ سال تے ٹی چین و اسلامی ملک آتا نیام اٹ تین پہ تینی سیاسی کمکاری و دودوربیدگی تبادلہ سوگو مسنے و کورونا دین انا تالانی آن پد اسلامی ریاست و چین دین انا برخلاف جنگ و ویکسین نا پٹ وپول و تیاری ٹی گچین کمکاری آ اواری اٹ کاریم کرینو۔ اوپارے کہ او اسلامی کمکار تنظیم کن چین نا اولیکو نمائندہ نا حیثیت اٹ اوآئی سی و اونا باسک آتون کمکاری ءِ سوگو کننگ و او آئی سی نا تعلقداری تے اسہ پوسکن ءُ کہول اسے آ سرکننگ کن کاریم کننگ نا است خواہی ءِ عملی دروشم اس ایتک۔
