واشنگٹن۔ 11جون (اے پی پی) پاکستانی نژاد زاہد قریشی امریکہ نا بنجائی عدالت نا اولیکو مسلمان امریکی بنجائی جج پن مریک۔ داچرجوئی ٹی سینیٹ اٹ تدوک آ دے مروک آ وونٹنگ اٹ صدر جوبائیڈن نا کنڈآن پندار پاکستانی نژاد زاہد قریشی نا مخ تفی ٹی 83و مخالفت اٹ 16وونٹ تما۔ او نیوجرسی ڈسٹرکٹ نا عدالت اٹ بنجائی جج انا زمواری تے پورو کیک۔ سینیٹ 2پین بنجائی جج آتا تقرری نا ہم منظوری ءِ تسنے۔ زاہد قریشی نا بطور اولیکو مسلم امریکی فیڈرل جج تقرری آن پاکستانی کمیونٹی ٹی خوشی اس تالان مس و اونا تقرری ءِ اسہ تاریخی ءُ وخت اس گوندانو۔ سینیٹ اٹی اکثریتی راہشون چک شومرپارے کہ زاہد قریشی امریکی تاریخ اٹ اولیکو مسلمان بنجائی جج مریک ہرا امریکہ نا مسٹ میکو غٹ آن بھلا مذہب ءِ۔ ننے نئے بیرہ تینا آبادی نا وڑوڑنا بلکن کسبی وڑوڑءِ ہم ودفنگے۔ ای سرپند مریوہ کہ صدر بائیڈن ہم کنتون داہیت آ امنا کیک کہ زاہد قریشی دانا اسہ سوگو ءُ درور اس مریک۔ بنجائی جج انا وڑاٹ زاہد قریشی نا پن انا سلاہ ءِ پیش کروک آ نیوجرسی نا ڈیموکریٹ سینیٹر کوری بوکر زاہد قریشی نا ستاءِ کرسا پارے کہ اوتینا ضمیر نا توار نا درشانی ءِ کروک آ و محب وطن ءُ بندغ اسے و اواسہ مسلمان اس ہم ارے۔ اوپارے کہ نن مذہبی تنوع و مذہبی تنوع نا جشن کننگ اُن۔ زاہد قریشی نا باوہ پاکستانی تارک وطن اسے۔ او نیویارک سٹی ٹی ودکی مس و نیوجرسی ٹی چنک آن بھلن مسنے ہراڑے او ریوٹزرلااسکول آن کانود اٹ ڈگری دوئی کرے۔ او2001ٹی اسہ لافرم اٹ ملازمت اختیار کرے ولے 11ستمبر 2001نا واقعہ غان پد اوامریکی فوج اٹ شمولیت اختیارکرے۔ اسہ فوجی وکیل اسے نا وڑاٹ خذمت سرترسا او کیپٹن نا رینک اسکان سرمس۔ اودے 2004آن 2006نا نیام اٹ عراق اٹ تعینات کننگا۔ فوجی خذمت ءِ ہلنگ آن پد او اول امریکہ نا محکمہ داخلی سلامتی کن و ولدا نیوجرسی ٹی امریکی اٹارنی نا دفتراٹ کاریم کرے۔
