اسلام آباد۔ 09جون (اے پی پی) وزیراعظم نا نمائندہ خصوصی مذہبی ہم آہنگی و دے ٹک نیامی و پاکستان علماء کونسل نا چیئرمین حافظ طاہر محمود اشرفی پارینے کہ ملکی سوگوی، رکھ و سلامتی کن مچ آ قوم یکجاءِ۔ پاکستان فلسطین نا ویل و کشمیر نا بارواٹ تینا موقف آن اسہ انچ اس ہم پدی مننگ کن تیار اف، ننے یکجا مرسا پاکستان نا برخلاف مروک آ چم آتے بے سہب کروئی ءِ۔ پاکستان اوغانستان اٹی امن خواہک، چِل سال آن دا ڈیہہ قربانی ترسا کرینے۔ داہیت ءِ او چارشنبے نادے آ پاکستان علماکونسل نا مرکزی مجلس شوریٰ نا دیوان آن پد میڈیا تون گپ و تران کرساپارے۔ حافظ طاہر محمود اشرفی پارے کہ مچ آ ملک اٹی پاکستان علماکونسل نا کنڈآن عالم دین و مشائخ کنونشن اڈتننگک۔ اوپیدوار کرے کہ ملک انا سلامتی، سوگوی کن عالم دینک و مشائخ و الس ہچ ءُ سمجھوتہ اس کننگ کپسہ۔ اوپارے کہ پاکستان آ زور شاغنگ نا کوشست کننگ انگ ءِ کہ پاکستان فلسطین و کشمیر نا ویل آ تینا موقف آن پدی مرے ولے نن پیدوار کینہ کہ پاکستان فلسطین نا ویل و کشمیر آ تینا موقف آن اسہ انچ اس ہم پدی مفک۔ اوپارے کہ آجوئی سلاہ درشانی و آجوئی صحافت آ نن دروہم اوار ئسن و اینو ہم اوار اُن ولے کس اس آجوئی سلاہ درشانی نا پن آ تینایا پیشن نا ایجنڈاءِ پورو کننگ خواہک تو داوڑمننگ کن ہلنگ پننگک۔ اوپارے کہ اسلامی تشخص نا ہرکہول آ رکھ ننا قومی، دینی، اسلامی و ملی زمواری ءِ۔ اوپارے کہ پاکستان نا گل زمین آ امریکی اڈہ جوڑ کننگ نا سجفنگ ہم مفک و نئے اونا موکل تننگ مریک۔ اوپارے کہ کس اس داوڑ سجفپ ہم کہ پاکستان نا گل زمین ءِ اسلام و پاکستان نا فائدہ غاتا برخلاف کاریم اٹ اتنگک۔ اوپارے کہ سٹی آ پروپیگنڈاتا مسخت ملک ءِ نزور کننگ ءِ۔ اوپارے کہ پاکستان علماء کونسل، اونا مجلس شوریٰ و عاملہ مدرسہ غاتا پوسکن آ تعلیمی بورڈ آتا پورو تائید و مخ تفی ءِ کیک۔ حافظ طاہرمحمود اشرفی پارے کہ نن متکن آ بورڈاتون ہم سلوک اُن، نن مسجد ومنبر نا چوکیدار اُن، عقیدہ ختم نبوت نا چوکیدار اُن، نن مہالو ہم مسیت و مدرسہ غاتون سلوک ئسن، اینوہم سلوک اُن ولے اگہ کس اس دا سمجھک کہ او مسجد ومنبر نا پن آ تینا جند انا ایجنڈاءِ پورو کیکیا ملک اٹ بدامنی تالان کیک تو اونا موکل اسل تننگ مفک۔ اوپارے کہ پاکستان علماکونسل فیصلہ کرینے کہ نن سنگت ہرابورڈاتون الحاق کننگ خوار، اوفتے کن درگہ ملوک ءِ، نن غٹ تعلیمی بورڈ آتا شرف ءِ کینہ۔ اوپارے کہ پاکستان اوغانستان اٹی امن خواہک، نن اوغانستان اٹ امن کن کوشست کننگ اُن۔ اوپارے کہ تدوک آ دے رابطہ عالم اسلامی مکہ مکرمہ نا کمک اٹ پاک اوغان علماکانفرنس مننگ ءِ، پاکستان علماکونسل اونا پورو تائید ومخ تفی ءِ کیک۔ اوپارے کہ نن اوغانستان نا سرکڑدہ و الس آن خواست کینہ کہ او امن کن مون آ بریر،چل سل آن داڈیہہ قربانی تننگ ءِ۔ اوپارے کہ اوغانستان نا امن پاکستان نا امن ءِ، ننکن اوغانستان و اوغانستان نا ہرشاری شرف تخک۔
