اسلام آباد۔ 09جون (اے پی پی) بنجائی وزیر سائنس و ٹیکنالوجی شبلی فراز پارینے کہ گڑا و سروس نا آب ءِ جہانی کہول آ اتنگ کن پینیک نا ادارہ بھازاہمیت تخک۔ وزارت سائنس وٹیکنالوجی پوسکن آ الیکٹرانک وونٹنگ مشین نا تیاری نا بناءِ کرے۔ الیکشن کمیشن نا آب آتا رداٹ پوسکن آ الیکٹرانک وونٹنگ مشین اسہ تُواٹی تیار مریک۔ اِراسال مشکل آتے ٹی ئسر داسہ حالیت آک گچین مننگ ءُ۔ ملکی زرگزران اٹ ترندی اٹ گچینی بننگ ءِ۔ اپوزیشن ملک اٹی دھاندلی والا نظام ءِ خواہک۔ چارشنبے نادے آ بنجائی وزیر سائنس و ٹیکنالوجی شبلی فراز ورلڈ ایکریڈیشنڈے انا بابت دود آن تران کرسا پارے کہ گڑا و سروس نا آب ءِ جہانی کہول آ اتنگ کن پینیک نا ادارہ بھاز اہمیت تخک۔ اوپارے کہ وزیراعظم نا مشن ءِ کہ پاکستان ءِ مون آ دننگ نا ءِ، دارداٹ ننے ادارہ غاتے سوگو کروئی مریک و اوفتا کسبی لائخی ٹی ودکی کروئی مریک۔ ننے غٹ گڑاتا المی آب انا تعین ءِ کروئی مریک تانکہ ملکی کہول آ آب اٹ گڑادوبرے۔ داڑتون اوار اوار جی امر ننا برآمدآتے ٹی ودکی نا سوب ہم جوڑمریک۔ شبلی فراز پارے کہ ننے گڑاتا آب انا بابت مخلوق اٹ آگاہی ہم ودی کروئی مریک۔ بنجائی وزیر پارے کہ پاکستان نیشنل ورلڈ ایکریڈیشنکونسل نا ادارہ برآمدآتے ودفنگ اٹ اہم ءُ کڑد اس ادا کننگ کیک، داادارہ پاکستانی مصنوعات آتے جہانی آب انا رداٹ اتنگ کیک۔ اوپارے کہ نن ادارہ غاتے فعال و اوفتا کچ و آب ءِ گچین کینہ۔ بنجائی وزیر پارے کہ وزارت سائنس و ٹیکنالوجی نا غٹ 17ذیلی ادارہ غاتے فعال کیوہ۔ شبلی فراز پارے کہ ننے جہانی کہول آ ہِننگ کن گڑاس آب مقرر کروئی مریک۔ آب انا گچین مننگ آن آب اٹ مصنوعات ودی مریک و برآمدآتے ٹی ودکی مریک۔ اوکان گڈ میڈیا تون گپ وتران کرسا بنجائی وزیر سائنس و ٹیکنالوجی شبلی فراز پارے کہ اینو اسکان ملک اٹ اخس کہ گچین کاری مسنے او جاگہ نا جاگہ اس تنازعہ نا گواچی مسنو۔ نن داغٹ ویل آتے چٹفنگ کن ٹیکنالوجی اس اتنگ نا فیصلہ کرینن۔ ٹیکنالوجی آن نمن مننگ پامداری اس مفک۔ ولے اپوزیشن ٹیکنالوجی آن انکار کرسا دھاندلی والا سسٹم ءِ خواہک۔
