اسلام آباد۔ 08جون (اے پی پی) وزیرخارجہ مخدوم شاہ محمود قریشی پارینے کہ کینیڈا ٹی پاکستانی نژاد فیملی تون پیش بروک آ است ہسون واقعہ، کناخڑک آ دہشت گردی نا واقعہ اسے وحوال آتارداٹ داٹی اسلاموفوبیانا عنصر ساڑی ءِ۔ داواقعی کینیڈین حکومت و راج اکن امتحان اسے۔ سے شنبے نادے آ کینیڈاٹی پاکستانی نژاد خاہوت تون پیش بروک آ است ہسون واقعہ نا بابت اسہ بیان اسے ٹی وزیرخارجہ پارے کہ زہمی خاہوت تون اولیکو رابطہ ٹورانٹو ٹی ننا قونصل جنرل نا مس۔ خاہوت، دااست ہسون سانحہ نا سوب ڈکھیائی نا گواچی ءُ۔ وزیرخارجہ پارے کہ نن اوفتا میت آتے پاکستان آ گدریفنگ نا سلہ خلکون ولے زہمی خاہوت ہموڑے جہہ جاگہ کننگ نا بابت معلومدار کرے۔ وزیرخارجہ پارے کہ مسہ بے گناہ، بے قصور چین داواقعہ غان زہمی مسنو۔ وزیرخارجہ نا پاننگ ءِ کہ پولیس نا جاست وپاست نا رداٹ داواقعہ ٹی اسلاموفوبیا نا عنصر ساڑی ءِ، کناخڑک آ دا دہشت گردی نا واقعہ اسے، شاہ محمود قریشی پارے کہ ننا قونصل جنرل ٹورانٹو پارے کہ داچرجوئی ٹی پولیس نا رویہ است جمی نا سوب ءِ، ہراباڈیک ملار اودرستی راستی نا قابل افس، داسکان پوسٹ مارٹم رپورٹ نا انتظار مننگ ءِ۔ وزیرخارجہ پارے کہ دابھاز بھلو دڑداسے۔ شاہ محمود قریشی پارے کہ ای بطور وزیرخارجہ پاکستان، کینیڈن وزیراعظم ءِ پاوہ کہ دا کینیڈین حکومت و راج انا امتحان ءِ، اوکینیڈاٹی رہینگوک آ مسلمان تا پت ءِ بحال کننگ کن واوفتا رکھ ءِ پک کننگ کن تینا کڑد ءِ ادا کے۔
