لاہور۔ 08جون (اے پی پی) گورنر پنجاب چوہدری محمد سرور تون مروک آ اوڑدہی ٹی اسپیکر قومی اسمبلی گورنر پنجاب ءِ سرسہب دورہ امریکہ غا مبارکبادی تس وخت اس کہ گورنرپنجاب و اسپیکر قومی اسمبلی اپوزیشن ءِ برانزی جلسہ غاتا جاگہ غا پارلیمنٹ اٹ مثبت کڑد ادا کننگ نا مشورہ تسر۔ سرجم حوال آتارداٹ گورنر پنجاب چوہدری محمد سرور تون اسپیکر قومی اسمبلی اسد قیصر گورنرہاؤس لاہور اٹی اوڑدہی کرے ہراٹی سیاسی، حکومتی و پارلیمانی باندات تون اوار ایلو باندات آتا بارواٹ گپ وتران کننگا وکینیڈاٹی مسلمان خاہوت نا زی آن ٹرک ءِ دننگ نا واقعہ نا مذمت ءِ کرسا داڑآ وارث آتون ہڑزخواہی نا درشانی ءِ ہم کرینو۔ اوڑدہی ٹی گورنرپنجاب چوہدری محمد سرور پارے کہ وزیراعظم عمران خان ملک ءِ مون آ اپوزیشن پدی دننگ خواہک ولے نن اوفتے ہچ ءُ حالیت اسے ٹی سرسہب مننگ کن الیپنہ انتئے کہ الس ننے 2023ء اسکان حکومت کننگ نا مینڈیٹ تسنے و آئینی مدءِ پورو کننگ تحریک انصاف نا حکومت نا آئینی و جمہوری حق ءِ، ہرادے انشاء اللہ نن پورو کینہ ولس گچین کاریک تینا تخوک آ وخت آ مریرہ و الس تینا وونٹ انا فیصلہ ءِ کیک کہ او دیر ءِ حکومت تننگ خوارہ۔ اوپارے کہ اپوزیشن اولیکو دے آن ای منپرہ نا پالیسی آ ہِننگ ءِ و ہرباندات اٹ اڑنگ شاغنگ سیاسی مخالف آتا اصل مشن جوڑ مسنے، گچین کاری اصلاحات آہم اپوزیشن تینا ضد آ سلوک ءِ و حکومت تون ہیت کننگ کن تیار اف اوفتا رویہ پورووڑاٹ غیرجمہوری و السی است خواہی تیان چپ ءِ نن آخبت ہندن ءُ گچین کاری خوانہ ہرافتیا کس اس ہورہرفپ ہنداخاطرآن اپوزیشن ءِ ہم مرے ضدءِ ہلسا گچین کاری اصلاحات آ ہیت کے۔ گورنر پنجاب پارے کہ زرگزرانی پڑاٹ پاکستان سہی کنڈآ مون آ ہِننگ ءِ اپوزیشن جماعت آتیان بیدس ہراسہ ملک زرگزرانی شونداری ءِ امنا کننگ ءِ پاکستان ءِ زرگزرانی وڑاٹ خواتہ مننگ آن بچفنگ نا کریڈٹ ہم تحریک انصاف نا حکومت ءِ کاہک و انشاء اللہ نن داسہ پاکستان ءِ غٹ ویل آتیان پورووڑاٹ خلاصی ترفنہ۔ اسپیکر قومی اسمبلی اسد قیصر گورنر پنجاب چوہدری محمد سرور ءِ سرسہب دورہ امریکہ نا مبارکبادی ترسا پارے کہ الحمداللہ اینو سفارتی تتون اوار ہرپڑآ پاکستان سرسہب مننگ ءِ و دنیا پاکستان آ پت انا درشانی ءِ کننگ ءِ وزیراعظم عمران خان پارلیمنٹ تون اوار غٹ ادارہ غاتے سوگو کننگ ءِ۔ حکومت ہر قومی معاملہ غا غٹ ءِ اوار ہلسا ہِننگ نا پولیسی آ روان ءِ ننے غٹ ءِ اواری اٹ پاکستانءِ پین سوگو و شونہال کننگ ناءِ۔
