اسلام آباد۔ 29مئی (اے پی پی) نیشنل فوڈ سیکورٹی اینڈ ریسرچ نا بنجائی وزیر سید فخرامام پارینے کہ اینخوسال ملک اٹی 6 اہم فصل آتون کشاری پیدوار اٹی ریکارڈ ودکی مون آ بسنے۔ ہفتہ نادے آ پریس کانفرنس آن تران کرساسیدفخرامام پارے کہ ساڑی حکومت نا گچین کشاری پالیسی،کشارگرآتے آب اٹ بج انا فراوانی و سازگار موسمی حالیت آتا سوب آن ملک اٹی اینخوناسال خولم، برنج، مکئی، پٹاٹہ، پیماز و مونگ پھلی نا پیداوار اٹی ریکارڈ ودکی مسنے۔ بنجائی وزیر پارے کہ وزیراعظم عمران خان نا کنڈآن کشاری بشخ اٹی جندی است خواہی نا سوب آن کشارگرآتا پت بحال مس و کشاری بشخ انا شاندار پیدوار نا دوئی مننگ مس۔ اوپارے کہ اینخوسال ملک اٹی خولم نا 27.3ملین ٹن ریکارڈ پیدوار مس ہراکہ تدوک آ سال انا 25.3ملین ٹن نا جم پیدوار آن 02ملین ٹن زیات ءُ۔ ہنداوڑ برنج، مکئی، پٹاٹہ، پیماز و مونگ پھلی نا پیدوار اٹی ہم ریکارڈ ودکی مون آ بس۔ بنجائی وزیر تیل دار غلہ سویابین، دال و گلبانی نا بشخ ءِ شون تننگ نا گرج آ زور شاغا وپارے کہ دنیا دابشخ آتیان کثیر زرمبادلہ کٹیا کننگ ءِ۔
