اسلام آباد۔ 29 مئی (اے پی پی) وزیرخارجہ شاہ محمود قریشی پارینے کہ پاکستان، عراق تون ہڑتوم آ کنڈآتا تعلقداری تے بھاز قدر انا نظر اٹ ہرک، دہشتگردی نا برخلاف جنگ اٹی ہڑتوم آ ملک آک اسہ ایلو نا آزموندہ غاتیان فائدہ ہرفنگ کیرہ۔ دفترخارجہ نا رداٹ ہفتہ نادے آ عراقی دارالحکومت بغداد اٹی وزیر خارجہ شاہ محمود قریشی تون و اونا عراقی ہم منصب فواد حسین نا نیام اٹ اوڑدہی مس۔ اوڑدہی ٹی ہڑتوم آ کنڈآتا تعلقداری، کثیر الجہتی بشخ آتے ٹی ہڑتوم آ کنڈآتا کمکاری ءِ مون آ دننگ تون اوار تین پہ تینی است خواہی نا اہم علاقائی و جہانی باندات آ گپ وتران کننگا۔ وزیر خارجہ دورہ عراق نا سلہ و پرخلوص مہمانداری آ عراقی وزیر خارجہ نا منت واری ءِ ہرفے و پارے کہ پاکستان، عراق تون ہڑتوم آ کنڈآتا تعلقداری تے بھاز قدر انا نظراٹ ہرک۔ ہڑتوم آ ملک آتا نیام اٹ برادرانہ تعلقداری نا بنداو اسہ وڑ تاریخی، مذہبی و تہذیبی قدر ءِ۔ شاہ محمود قریشی پارے کہ نن تینا جغرافیائی سیاسی اولیت آتے جغرافیائی اقتصادی اولیت آتے ٹی بدل کرینن۔ پاکستان و عراق نا نیام اٹ، واپار، زرکاری، تعلیم، ٹیکنالوجی، انفراسٹرکچرڈویلپمنٹ تون اوار تین پہ تینی است خواہی نا بشخ آتے ٹی ہڑتوم آ کنڈآتا کمکاری نا مون آ دننگ نا بھلو وارخواہی اس ساڑی ءِ۔ شاہ محمود قریشی پارے کہ پاکستان 22کروڑ آبادی نا مون آ بروک آ مارکیٹ ءِ ہراڑے زرکاری نا بے شمار وارخواہی دوئی ءِ۔
