اسلام آباد۔ 28مئی (اے پی پی) وزیراعظم عمران خان پارینے کہ نن زیات مشکل وخت آن پیش تمانن، داسہ جوان انگا وخت بننگ ءِ، مخالف آک اقتصادی شرح نمو آ حیران ءُ، صنعتی زون تا جوڑ کننگ آن ملکی برآمد آتے ٹی ودکی مریک۔ داخیال آتا درشانی ءِ او جمعہ نادے آ رشکئی اولیتی خصوصی اکنامک زون نا کمرشل لانچ انا دود آن تران کرسا کرے، وزیراعظم عمران خان پارے کہ اینو نئے بیرہ خیبرپختونخوا بلکن پاکستان کن ہم ستاکڑزوک ءُ دے اسے، صنعت سازی آن بیدس دولت نا پیدوار اٹی ودکی اف، رشکئی اکنامک زون سی پیک نا بشخ اسے، وزیراعظم پارے کہ چین دنیا ٹی غٹ آن زیات ترندی اٹ شون ہلوک آ ملک ءِ۔ دیکی نا صنعتی شونداری متکن ءُ ہیت اسے، ننے چین نا صنعتی شونداری آن ہیل کننگ نا گرج ءِ، اووزیراعلیٰ خیبرپختونخوا ءِ پارت کرے کہ زون نا ڈغار تے بہا کننگپ بلکن لیز آ صنعت کار آتے تننگے تانکہ صنعت آک قائم مریر، بجائے دانا ڈغار تا ہلنگ و بہامرے و لیز ہم کم تخرتانکہ صنعت کار آک داڑے صنعت آتے قائم کننگ کیر۔ وزیراعظم پارے کہ داڑے ہندن ءُ صنعت لگک ہرافتیان برآمد آک ودر۔ وزیراعظم پارے کہ ہراتم اسکان نن برآمد آتے ودفپنہ دولت نا پیدوار اٹی ودکی مریک۔ چین ہراوڑ صنعت ءِ شون تس و برآمد آتے ودفنگ کن اکنامک زون جوڑ کرے ننے ہم جوڑ کروئی مریک۔ بدبختی اٹ مستین اٹ برآمد آتے ودفنگ آ چکار کننگتو و پاکستان ءِ زرکار دوست ملک اس جوڑ کننگتو۔ رشکئی اکنامک زون نا جوڑ مننگ آن برآمد آتے ٹی ودکی مریک اووزیراعلیٰ ءِ پارت کرے کہ زرکار آتے کن آسانی ودی کے، ون ونڈو آپریشن مرے۔ حکومت نا کاریم زرکار آتے کن آسانی ودی کننگ ءِ، وزیراعظم پارے کہ چین نا صنعت آک داسہ ہموملک آتیا گدریفنگ انگ ءُ ہراڑے خڑچ کم بریک۔ نن چینی زرکارآتے پاکستان آاتنگ نا خواہندار اُن۔ نن پیشن نا ملک تینا زرکارآتے ہم ترغیب ایتنہ ہرا بنگلہ دیش، دبئی، ملائیشیا و ایلو ملک آتے ٹی فیکٹری خلیرہ تو داڑے انت اکن خلنگ کپسہ۔ اوپارے کہ اللہ تعالیٰ پاکستان ءِ بھاز انگا وسیلہ غاتے تسنے نن اقتدار ءِ سنبھالان تو پاکستان خواتہ مننگ نا خڑک آ ئس وام تا قسط آتے تننگ کن پیسہ الوکہ۔ نن بھاز مشکل وخت اسے آن گدرینگان، چین سعودی عرب و متحدہ عرب امارات کون آ سنگت ہمووخت آ ننا کمک ءِ کتورہ تو نن خواتہ مسنہ و دانا مطلب دامسکہ کہ روپئی نا قدر پین تماکہ و کبینی نا طوفان مسکہ۔ ولے اللہ نا شکر ءِ کہ او مشکل وخت گدرینگا۔ داکنا زند انا مشکل ءُ وخت اس ئس۔ اوکان پد کورونا دین انا دین بس ہرامچ آ دنیا ءِ زہمی کرے ولے الحمداللہ کورونا دین انا حالیت آتیان ہراوڑپاکستان پیش تما اونا درور ملیپک۔ اللہ تعالیٰ ننے آ کرم مرے۔ این سی اوسی گچین وڑاٹ تینا کڑد ءِ اداکرے۔ کنے آ لاکھ ڈاؤن خلنگ کن بھاز زور ئس ولے ای پریشر اٹ بروسٹ تو ننا حال ہم بھارت آنبار مسکہ۔ وزیراعظم پارے کہ بین نا خلوک مخلوق ءِ لاک ڈاؤن نا کمک اٹ اُراتے ٹی بند کننگ مفک۔ بھارت ٹی لاک ڈاؤن آن مخلوق اسہ کنڈآ بین آن کسک و ایلو کنڈآ ناجوڑی آن ولے الحمداللہ نن تینا مخلوق ءِ بین آن کہینگ آن بچفین و اللہ ناجوڑی آن رکھا۔ وزیراعظم پارے کہ زرگزران نا حالیت گچین مننگ ءِ مخالف آک حیران ءُ و داسہ پاننگ ءُ کہ داخہ زیات شرح شونداری امر مس۔ ای اوفتے پاننگ خواوہ کہ نن دھاندلی کپنہ۔ نیوٹرل ایمپائر کرکٹ اٹی ہم ایسن و داسہ ہم نیوٹرل ایمپائر نا کمک اٹ کٹنگ والا اُٹ۔ وزیراعظم پارے کہ مشکل حالیت آتیان پد ہم پاکستان نا زرگزران گچین مننگ ءِ۔ لارج اسکیل مینوفیکچرنگ ودنگ ءِ۔ بزغر شونہال مننگ ءُ۔ گنڈیری، برنج، خولم تون اوار فصل آتا ریکارڈ پیدوار مسنے و بزغرآتے ریکارڈ پیسہ ملانے۔ شوگر مل آک بزغر تے بھلو وخت اسکان اوفتا پیسہ غاتے تتورہ وگنڈیری نا نہاد آک ہم کم ئسر نن گنڈیری نا نہاد اٹ ہم ودکی کرین و بزغرآتے اوفتا معاوضہ ہم ترفین۔ خلق آتے ٹی شونہالی بسنے، ٹیکٹر، موٹرسائیکل، گاڈی و کھد ریکارڈ بہامسنے۔ صنعت آک چلینگ نا بناءِ کرینو۔ جوان انگا وخت بننگ ءِ۔ ای قوم ءِ پاریسٹ کہ خلوئی اف، صبر اٹ کاریم ہلوئی ءِ ولے مخلوق صبر کتوکہ خلیسکہ۔ اللہ تعالیٰ ءِ انسان نا مشکل اٹ صبر کننگ نا صفت بھاز وڑک۔ دود اٹی وزیراعلیٰ خیبرپختونخوا محمود خان و چین نا سفیر ئسک ہم ساڑی ئسر۔ چینی سفیر دود آن تران کرسا پارے کہ اقتصادی زون تیان کاروباری سرجزآتے ٹی ترندی بریک۔ ہڑتوم آ کنڈآتا اقتصادی کمک اٹ ہڑتوم آ ملک آتا زرگزران تے فائدہ رسینگک۔ ڈٹ انا بناء آ وزیراعظم عمران خان و حکومت ءِ مبارکبادی ایتیوہ۔ اوپارے کہ حکومتی گام گیج آن پاکستان اٹ پین چینی زرکاری بریک۔
