اسلام آباد۔ 28 مئی (اے پی پی) وزیراعظم عمران خان اینو جمعہ نادے آ رشکئی اولیتی خصوصی اکنامک زون نا کمرشل لانچ انا دود اٹی مہمان خاص مریک۔ وزیراعظم میڈیا آفس نا کنڈآن جاری بیان نا رداٹ چائنہ نا انٹرپرائز”سینچری اسٹیل پرائیویٹ لمیٹڈ“ نا 366ملین ڈالر نا زرکاری نا تفنگ نا اینو بنامننگ ءِ۔ رشکئی اولیتی خصوصی اکنامک زون چائنا پاکستان اقتصادی راہداری کلسٹر نا اسہ بشخ اسے ہرا صوبہ ٹی بھلو کچ اسے آ زرکاری و روزگار نا وارخواہی ودی کننگ نا بابت اسہ اہم ءُ مزل نا نشان اس مریک۔ پاکستان و چائنا سی پیک ڈٹ آتا وخت آ پوروی و چائنا پاکستان اقتصادی راہداری ءِ بی آر آئی نا اسہ بڑزکو آب انا درشانی کننگ کن سنبرینگوک ءِ۔ رشکئی اولیتی خصوصی اکنامک زون چائنا پاکستان اقتصادی راہداری فریم ورک انا رداٹ خیبرپختونخواحکومت و خیبرپختونخوااقتصادی زون ڈویلپمنٹ اینڈمینجمنٹ کمپنی (KPEZDMC)نا فلیگ شپ ڈٹ اسے۔ رشکئی اولیتی خصوصی اکنامک زون کم و ود اسہ ہزار ایکڑ ڈغار آ تالان ءِ ہرا ایم ون موٹروے آ چائنا پاکستان اقتصادی راہداری روٹ و صوبہ نا ایلو ضلع غاتون گنڈوک ءِ، ہرانا سوب آن دا ڈٹ تزویراتی لحاظ اٹ نمان حیثیت تخک۔ رشکئی اولیتی خصوصی اکنامک زون نا پوروی چین نا ریاستی ملکیتی انٹرپرائز”چائنا روڈ اینڈ برج کارپوریشن“(CRBC)و“ خیبرپختونخوا اقتصادی زون ڈویلپمنٹ اینڈ مینجمنٹ کمپنی ”(KPEZDMC)نا شریداری اٹ کننگ انگ ءِ۔ رشکئی اولیتی خصوصی اکنامک زون اٹی دواسازی، ٹیکسٹائل، فوڈ اینڈ بیورویجز، اسٹیل و انجینئرنگ تون تعلقدار صنعت آک مریرہ۔ 700ایکڑ ڈغارنا لیز انا رداٹ داتم اسکان 2 ہزار ایکڑ ڈغار آن زیات کن آن لائن درخواست دوئی مسنے۔ داڈٹ آن کم و ود اِرالکھ ہندی بندغ آتے بلاواسطہ و بالواسطہ ملازمت نا وارخواہی دوبریک۔
