اسلام آباد۔ 28 مئی (اے پی پی) وزیر خارجہ مخدوم شاہ محمود قریشی عراقی ہم منصب نا سلہ غا جمعہ نادے آ عراق نا مسہ دے ئی دورہ غا روانہ مس۔ وزیر خارجہ، عراقی ہم منصب فواد حسین تون خصوصی اوڑدہی کیک۔ دااوڑدہی ٹی ہڑتوم آ کنڈآتا تعلقداری، کثیر الجہتی بشخ آتے ٹی ہڑتوم آ کنڈآتا کمکاری نا مون آ دننگ، مسلم امہ ءِ مون تروک چیلنج آتون اوار اہم علاقائی و جہانی باندات آ گپ وتران کننگک۔ وزیر خارجہ، عراق نا صدر برہام صالح تون اوار عراق نا بڑزکو سرکڑدہ غاتون ہم اوڑدہی کیک۔ وزیر خارجہ عراقی سرکڑدہ غاتون اوڑدہی تے ٹی ہرسال ”زیارت کن عراق آ بروک آ زائر“ آتا مشکل و اوفتا آسراتی کن گام گیج آتا بابت ہم گپ وتران کیک۔ عراقی سرکڑدہ غاتون ہڑتوم آ کنڈآتا سیاسی و دفاعی کمکاری ءِ ودفنگ نا بابت ہم گپ وتران مریک۔ وزیر خارجہ نا دادورہ عراق، وزیراعظم عمران خان نا وژن ءِ مون آ تخسا مسلم ملک آتون بڑزکو کہولی رابطہ غاتا مون آ دننگ نا اسہ کڑی اسے۔ گمان ءِ کہ وزیر خارجہ نا دادورہ عراق آن ہڑتوم آ ملک آتا نیام اٹ ہڑتوم آ کنڈآتا تعلقداریک پین سوگو مریرہ۔
