اسلام آباد۔ 28 مئی (اے پی پی) دفترخارجہ یوم تکبیر نا وخت آ پاکستان نا برخلاف ہروڑنا جارحیت نا برخلاف ملکی وتواجہی، علاقائی سالمیت و آجوئی نا رکھ انا تینا عزم انا درشانی ءِ کرساپارینے کہ پاکستان علاقائی و جہانی کہول آ پرامن و سوگوی نا چاگڑد نا مون آ دننگ کن کاریم کننگ کن سنبرینگوک ءِ۔ پاکستان جوہری تخفیف سلہہ غاتا بابت جہانی آب آتے سوگو کننگ کن جہانی کوشست آتے ٹی فعال کڑد ادا کننگ ءِ و قومی کہول آ برآمدی کنٹرول، جوہری رکھ و سلامتی نا پوسکن انگا جہانی آب آتیا عمل کننگ ءِ۔ ترجمان نا پاننگ ءِ کہ اینخوسال، یوم تکبیر کراچی ٹی 1100میگاواٹ نا 2 نیوکلیئر پاور پلانٹ آتا بناءِ کننگ نا وخت آ اڈتننگ انگ ءِ ہراقومی توانائی بشخ اٹی بھاز نہادی، ساف ستھرا، پت انا قابل و اڑزآن بجلی نا ودکی کرینے، ہرا ملک انا راجی و زرگزرانی شونداری و الس نا راجی آسراتی ٹی جوہری سائنس و ٹیکنالوجی نا کڑد انا ڈیک ءِ۔ ایٹمی بجلی ودی کننگ آن بیدس پاکستان کینسر نا تشخیص و درمان، جان جوڑی، کشت وکشار، ماحولیاتی رکھ و صنعت تون اوار چندی بشخ آتے ٹی السی خذمت آتے کن جوہری ٹیکنالوجیءِ کاریم اٹ ایسونے۔ ترجمان پارے کہ مچ آ قوم پاکستان نا سلامتی و شونداری کن تینا سائنسدان، انجینئرو تکنیکی چاہندار آتا خذمت آتے خراج تحسین پیش کیک۔
