ہری پور۔ 27 مئی (اے پی پی) وزیراعظم عمران خان پارینے کہ پاکستان 5 جون آ جہانییوم ماحولیات نا میزبانی ءِ کیک، پاکستان ہمو دہ ملک آتے ٹی اوار ءِ ہرا ماحولیاتی اثرآتا زیات گواچی ءُ، دہ بلین ٹری سونامی، قومی پارک انا جوڑ کننگ نا ڈٹ آتون اوار ایلو گام گیج آک داحالیت آتون مون تننگ نا چرجوئی نا کڑی اسے، پوسکن آ چین ءِ ماحولیاتی بدلی تیان پاک پاکستان اس ایتنہ۔ او پنچ شنبے نادے آ داڑے وزیراعظم ضلع ہری پور اٹی دہ بلین ٹری سونامی پروگرام نا رداٹ اڈ ہلوک آ دود آن تران کریکہ۔ داوخت آ وزیراعظم عمران خان نیال اس ہم خلک۔ خصوصی کمکار موسمیاتی بدلی ملک امین اسلم وزیر اعظم ءِ دہ بلین ٹری سونامی پروگرام نا سرسہبی تا بارواٹ بریف کرے۔ وزیراعظم داوخت آ اقوام متحدہ نا ماحولیات پروگرام نا”نیچر کیپٹل آف پاکستان“ رپورٹ آ ہم حوال ہم ہلک۔ وزیراعظم تران کرسا پارے کہ جہانییوم ماحولیات نا وخت آ دود آتا میزبانی پاکستان نا شرف ءِ، پاکستان دنیا نا ہمو منہ ملک آتے ٹی اوار ءِ ہرا ماحولیاتی بدلی و جہانی حدت تون مون تننگ کن سنجیدہ کوشست کننگ ءِ، داگام گیج آک نشان تروک ءُ افس بلکن بروک آ چین تیکن گچین پاکستان کن ءُ۔ اوپارے کہ پاکستان ہمو دہ ملک آتے ٹی اوار ءِ ہرا ماحولیاتی بدلی تا غٹ آن زیات گواچی ءُ، دیر انا دریاب آتا سیبو گلیشئر آتیاٹی ءِ و جہانی حدت نا سوب آن ہراترندی اٹ دا تالان مننگ ءُ داڑآن دیر انا حالت اٹ بھاز مشکل آتون مون تروئی تمنگ کیک، ہنداحالیت بھارت تون ہم ارے اونا دیر انا سیبو ہم گلیشئرآٹی ءِ۔ اوپارے کہ دا چرجوئی ٹی نن کوشست کننگ اُن تانکہ بروک آ چین تیکن جوان ءُ پاکستان اس ہلن کان۔ اوپارے کہ ہراتم نن چنک ئسن ہموتم جنگل آک باکثرت ئسر، شارک ساف ستھرا ئسر، اسہ جاگہ اس ہم کچٹی الوکہ، مریس مد ڈٹ بندی مفننگ نا سوب آن دابھسکاری مس۔ اوپارے کہ داحالیت آتے ٹی گچینی اتنگ مریک، سنگاپور اٹی منہ وخت مست وہوک آ دریاسیوریج نا نالہ نا منظر اس پیش کریکہ ولے داسہ اودے ہران تو ساف شفاف ءِ و اوٹی مچھیک تار خلنگ ءُ، نن ہم داماحول ءِ پدی اتنگ کینہ۔ دہ بلین سونامی ٹری ڈٹ ہندا چرجوئی نا اسہ کڑی اسے، نن قومی پارک جوڑ کننگ اُن داڑآن وائلڈ لائف وبرڈ لائف رکھ مریک، سیل و سوات نا وارخواہی ودی مریک، جنگل آتے ٹی کمتی آن وائلڈ لائف اٹی ہم کمتی مسنے۔ اوپارے کہ ڈیرہ اسماعیل خان اٹی جنگل خلنگ آن داڑے وائلڈ لائف ہم بسنے۔ اوماحولیاتی بدلی و بلین ٹری ڈٹ آ سرسہبی اٹ عملدرآمد آ امین اسلم و اونا ٹیم ءِ مبارکبادی تس۔
