اسلام آباد۔ 27 مئی (اے پی پی) اقوام متحدہ نا جنرل اسمبلی نا صدر وولکان بوزکیر پنچ شنبے نادے آ وزارت خارجہ ٹی وزیر خارجہ مخدوم شاہ محمود قریشی تون اوڑدہی کرے۔ دفترخارجہ نا ہیت وگپ اٹی فلسطین نا ویل، بھارت نا غیر کانودی کوزہ ٹی جموں و کشمیر نا حالیت، اوغان امن عمل تون اوار تین پہ تینی است خواہی نا باندات آتیا گپ وتران مس۔ وزیر خارجہ جنرل اسمبلی نا صدر ءِ وزارت خارجہ غا بننگ آ بخیر اٹ پارے و فلسطین نا بابت جنرل اسمبلی نا ہلہلہ ئی دیوان ءِ بٹنگ کن اونا پبی کوشست آتا ستاءِ کرے۔ وزیر خارجہ پارے کہ اسرائیلی ظلم ءِ تورفنگ کن ”سیز فائر“ اولیکو مسخت ئس ہراٹی سرسہبی دوئی مس۔ مخدوم شاہ محمود قریشی پارے کہ اسل مسخت، اقوام متحدہ نا سلامتی کونسل نا قرارداد آتے مون آ تخسا فلسطین نا ویل و کشمیر نا ویل انا منصفانہ ایسری ءِ۔ فلسطین نا ویل ءِ آخبتی بنداو تیا ایسر کننگ آن بیدس دے ٹک نیامی ٹی امن مننگ کپک۔ شاہ محمود قریشی پارے کہ ہنداوڑ کشمیر نا ویل ءِ ایسر کننگ آن بیدس، سویلی ایشیاٹی امن مننگ کپک۔ اوغانستان نا بابت وزیر خارجہ پارے کہ پاکستان، اوغانستان اٹی امن نا خواہندار ءِ، اوغان امن عمل اٹ پاکستان نا خیرخواہی کڑد انا جہانی کہو ل آ ستاءِ کننگا۔ وزیر خارجہ کورونا دین انا جہانی دین انا چیلنج تون مون تننگ کن صدر جنرل اسمبلی نا گام ”ویکسین فارآل“ انا ستاءِ کرسا پارے کہ دادین آن پورو خلاسی کن المی ءِ کہ غٹ ءِ رکھ کننگے۔
