اسلام آباد۔ 27 مئی (اے پی پی) وزیر خارجہ مخدوم شاہ محمود قریشی پارینے کہ امن، سلامتی کونسل نا بنداوی زمواری ءِ، پاکستان، اقوام متحدہ سلامتی کونسل نا قراردادآتے مون آتخسا فلسطین نا ویل و کشمیر نا ویل انا آخبتی منصفانہ ایسری نا خواہندار ءِ۔ دفترخارجہ نا رداٹ وزیر خارجہ شاہ محمود قریشی و صدر جنرل اسمبلی وولکان بوزکیر نا نیام اٹ ڈل آتا کہول آمذاکرات پنچ شنبے نادے آ وزارت خارجہ ٹی اڈ ہلک۔ دامذاکرات اٹی فلسطین و جموں و کشمیر نا حالیت، اقوام متحدہ سلامتی کونسل اصلاحات، اوغان امن عمل، وکورونا ویکسین نا دوئی تون اوار تین پہ تینی است خواہی نا چندی باندات آ گپ وتران کننگا۔ وزیر خارجہ پارے کہ فلسطین نا ویل و کشمیر نا ویل دہائی تیان اقوام متحدہ سلامتی کونسل نا ایجنڈاغاٹو۔ پاکستان، اقوام متحدہ سلامتی کونسل نا قرارداد آتے مون آ تخسا فلسطین نا ویل و کشمیر نا ویل انا آخبتی منصفانہ ایسری نا خواہندار ءِ۔ وزیر خارجہ پارے کہ امن، سلامتی کونسل نا بنداوی زمواری ءِ۔ شاہ محمود قریشی پارے کہ اقوام متحدہ سلامتی کونسل اصلاحات نا بابت ہم سرجم گپ وتران کرسا پارے کہ پاکستان، اقوام متحدہ سلامتی کونسل ءِ پین گچین و فعال کننگ کن اصلاحات ءِ المی گوندک۔ وزیر خارجہ صر جنرل اسمبلی ءِ مقبوضہ جموں و کشمیر اٹی برجاانسانی حق انا بھلا خلاف ورزی تا سرجم آتیان معلومدار کرے و پارے کہ ہندوستان نا کنڈآن مقبوضہ جموں و کشمیر اٹی آبادیاتی کچ انا بدلی نا گام، اقوام متحدہ سلامتی کونسل نا قرارداد و جہانی کانود نا اسل خلاف ورزی ءِ۔ اوپارے کہ غزہ و مقبوضہ جموں و کشمیر اٹی برجا انسانی حق انا بھلا خلاف ورزی تے تورفنگ و مظلوم فلسطینی و کشمیری تے جبرو استبداد آن نجات ترفنگ کن اقوام متحدہ سلامتی کونسل ءِ گچین کڑد ادا کننگ نا گرج ءِ۔ وزیر خارجہ اوغانستان اٹی امن نا بابت پاکستان نا خیر خواہی کوشست آتیان صدر جنرل اسمبلی ءِ معلومدار کرے۔ وزیر خارجہ پارے کہ ڈیہہ ٹی امن و سوگوی و رابطہ غاتا مون آ دننگ کن اوغان امن عمل نا نتیجہ خیز مننگ بھاز المی ءِ۔ پاکستان، اوغانستان تون اوار ڈیہہ ٹی امن کن تینا خیرخواہی نا کوشست آتے برجاتخنگ کن سنبرینگوک ءِ۔ وزیر خارجہ کورونا دین انا دین آن بچنگ و ویکسین نا دوئی کن صدر جنرل اسمبلی نا کوشست آتا ستاءِ کرسا پارے کہ غٹ آملک آک خاص وڑاٹ پدتموک ملک آتے کورونا ویکسین نا فراوانی کن جہانی کہول آ اسیجائی لائحہ عمل اس اختیار کننگ نا گرج ءِ۔ وزیر خارجہ کورونا دین انازرگزرانی زہم تتون مون تننگ کن وزیراعظم عمران خان نا ”وام تا زرتس اٹ آسراتی“ نا گام گیج آن معلومدار کرے۔ صدر جنرل اسمبلی جم وجوش اٹ بخیر و میزبانی آ وزیر خارجہ نا منت واری ءِ ہرفے۔ صدر جنرل اسمبلی وولکان بوزکیر فلسطین نا بابت اڈ ہلوک آ جنرل اسمبلی نا ہلہلہ ئی دیوان اٹی، پاکستان نا پیدوار موقف و وزیر خارجہ نا پبی بشخ ہلنگ نا ستاءِ کرے۔
