اسلام آباد۔ 27 مئی (اے پی پی) وزیر مملکت حوالکاری و شینکاری فرخ حبیب پارینے کہ پیپلزپارٹی جم وام تا 32 درسد، مسلم لیگ ن 56 درسد وخت اس کہ ساڑی آ حکومت 3 سال اٹی 21درسد ہلک، حکومت سالانہ 3 ہزار ارب وام ادا کننگ کن تننگ ءِ، ساڑی حکومت پیپلزپارٹی و ن لیگ نا ہلوک آ وام تے پدی تننگ ءِ، اگہ بجٹ آن وام تیا سود انا زرتس ءِ کشر تو حکومت نا پرائمری بیلنس سرپلس اٹی ءِ یعنی بجٹ نا رداٹ حکومتی کٹیا خڑچ آتیان زیات ءِ۔ پنچ شنبے نادے آ وزیر مملکت حوالکاری و شینکاری فرخ حبیب بلاول زرداری نا بیان آ تینا ردعمل اٹ پارے کہ 2008اٹی پیشن نا وامک 46 بلین ڈالر ئسرہرا 2013اسکان ودسا 60.09ملین ڈالر مسر، پیپلزپارٹی نا دور اٹی پیشن نا وام تے ٹی 32درسد ودکی مس۔ 2013آن 2018اسکان ملک انا پیشن نا وامک 95.24ملین ڈالر مسر، مسلم لیگ ن نا دور اٹی پیشن نا وام تے ٹی 56 درسد ودکی مس۔ ساڑی حکومت مارچ 2021اسکان جم وام تا 21 دسد وام ہلک۔ ساڑی حکومت پیپلزپارٹی و ن لیگ نا ہلوک آ وام تے پدی تننگ ءِ۔ اوپارے کہ غٹ ترسرسہبیک وزیراعظم عمران خان نا پامدار پالیسی و فیصلہ غاتا سوب آن دوئی مسنو۔ تدوک آ دے پاکستان اسٹاک ایکسچینج اٹی 1.5 ارب شیئرز کاروبار نا پوسکن ءُ ریکارڈ اس مس۔ زرکارآتا پکا پت پین سرسہبی تا کسر ملک۔ اوپارے کہ بلاول صاحب، نے پاکستان نا جم قومی پیدوار (جی ڈی پی) 4 درسد آ شون ہلسا انت اکن کیدنگ مفننگ ءِ، کوویڈ۔ 19 نا سوب آن بھارت نا مالی سال پورو مننگ آ گروتھ منفی 8 درسد، برطانیہ نا گروتھ منفی 9.9، بنگلہ دیش 1.6درسد، ترکی 1.8آسلوک ءِ، دا چیلنج آک مفروسر تو ننا گروتھ پین گچین مسکہ۔
