اسلام آباد۔ 27 مئی (اے پی پی) بنجائی وزیر حوالکاری و شینکاری چوہدری فواد حسین پنجاب بارکونسل نا ڈل اوڑدہی کرے۔ پنجاب بارکونسل تینا گچین کاری تے بائی میٹرک وڑاٹ کرفنگ کن حکومت آن آسراتی فراوان کننگ نا خواست کرے۔ اوڑدہی ٹی گپ وتران کرسا بنجائی وزیر حوالکاریچوہدری فواد حسین پارے کہ حکومت پنجاب بار کونسل ءِ الیکٹرانک وونٹنگ نا آسراتی فراوان کیک، وکلابرادری ءِ الیکٹرانک وونٹنگ نا بارواٹ ڈاکٹر بابر اعوان و علی ظفرتون اوار حوال تننگک۔ اوپارے کہ حکومت وکلابرادری نا ویل آتیان معلومدار ءِ،وکیل آتا راجی آسراتی کن گام گیج کننگ انگ ءِ۔ اوپارے کہ ینگ لائرآتے سرسہب ورناپروگرام نا رداٹ 10 لکھ روپئی اسکان وام تننگ آ سجفنگ انگ ءِ۔ بنجائی وزیر پارے کہ حکومت وکیل آتے کن ہاؤسنگ کالونی جوڑ کننگ کن گام گیج کننگ ءِ وخت اس کہ وکیل آتے جان جوڑی کارڈ فراوان کننگ نا سلاہ غاہم سجفنگ انگ ءِ۔ اوپارے کہ وکلابرادری قومی ایشوتیا قائدانہ کڑدادا کے۔ پنجاب بارایسوسی ایشن نا باسک آک بنجائی وزیر ءِ تینا ویل آتیان معلومدار کریر ہراڑآ بنجائی وزیر ویل آتے اولیتی بنداو تیا ایسر کرفنگ نا باورکرفے۔ پنجاب بارکونسل نا ڈل اٹی وائس چیئرمین امجداقبال خان، انٹراپراونشل اینڈ فارن افیئرز کمیٹی نا چیئرمین منیر احمد بھٹی، پنجاب بارکونسل نا باسک راجہ ظفراقبال، چوہدری محمد اشفاق کہوٹ، رانا ضمیر احمد جھڈو، آصف شہزاد چوہدری، فرخ عارف بھٹی، چوہدری سہیل شمشاد ایڈووکیٹ، ظفراقبال منگن ایڈووکیٹ، وسیم اصغر ایڈووکیٹ، کامران منجد ایڈووکیٹ و ندیم طاہر، سیکشن آفیسر اوار ئسر۔
