اسلام آباد۔ 27 مئی (اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ بنجائی حکومت گلگت بلتستان نا شونداری و شونہالی کن پبی وسیلہ غاتے کاریم اٹ اتنگ ءِ ہراڑآن ڈیہہ ٹی شونہالی نا اسہ پوسکن ءُ دوراس بناکننگ ءِ، اوداخیال آتا درشانی ءِ اسلام آباد اٹی گلگت بلتستان آن تعلق تخوک آ اسہ نمائندہ ڈل اسے تون گپ وتران کرساپارے۔ اوپارے کہ بنجائی حکومت گلگت بلتستان اٹی سیل و سوات نا شونداری کن پبی عملی گام گیج کننگ ءِ و دارداٹ ملک انا اہم شارتیان گلگت وسکردو کن فلائٹ آتا بنااسہ بھاز بھلو پیش رفت اسے۔ اوپارے کہ داکان بیدس گلگت و سکردو نا ایئر پورٹ آتے اپ گریڈ کننگ کن گام گیج آتیا پیش رفت برجاءِ وداگام گیج آک گلگت بلتستان اٹی سیل و سوات نا شونداری نا بابت اسہ گیم چینجر گام اس جوڑ مریرہ۔ اوپارے کہ حکومت گلگت بلتستان اٹی ہندی سیل و سوات آن بیدس جہانی سیل و سوات نا شونداری کن ہم پبی گام گیج کننگ ءِ۔ بنجائی وزیر گلگت بلتستان کن وزیراعظم عمران خان نا کنڈآن 370ارب روپئی نا شونداری پیکج آ گپ وتران کرسا پارے کہ دا شونداری پیکج آن گلگت بلتستان نا 73 سالہ محرومی تے مر کننگ اٹ پبی کمک رسینگک۔ اوپارے کہ تحریک انصاف نا حکومت گلگت بلتستان و آزاد کشمیر اٹی شونداری عمل ءِ مدام تینا اولیت آتے ٹی اوار کرینے و ہنداسوب ءِ کہ داعلاقہ غاتے ٹی مستین اٹ مسلم لیگ (ن) نا حکومت آتا ساڑی گری آن پد ہم تحریک انصاف نا بنجائی حکومت مدام اونا شونداری بجٹ اٹی پبی ودکی کرے۔ اوپارے کہ حکومت نا داتاریخ ساز گام گیج آن گلگت بلتستان آخبت خڑک اٹ پاکستان نا نئے بیرہ شون ہلوک علاقہ اس جوڑ مرسا مون آ بریک بلکن پاکستان نا زرگزرانی شونداری نا بابت بیس کیمپ اسے نا وڑاٹ ہم چاہنگک۔
