سکھر۔ 27 مئی (اے پی پی) قائد حزب اختلاف حلیم عادل شیخ سندھ اٹی امن و ایمنی نا خراب حالیت آتیا رپورٹ اس وزیراعظم آ گدریفے، رپورٹ اٹی آئی جی سندھ ءِ دمدستی اینک کننگ نا خواست کننگانے، رپورٹ اٹی پاننگانے کہ پیپلزپارٹی نا حکومت آن پد مچ آ سندھ اٹی امن و ایمنینا حالیت خراب مسنے۔ مسہ تُو اٹی سکھر و لاڑکانہ ریجن اٹی 250آن زیات بندغ زوال کرینو۔ قائد حزب اختلاف سندھ اسمبلی حلیم عادل شیخ نا ترجمان نا کنڈآن جاری کروک بیان نا رداٹ حلیم عادل شیخ سندھ اٹی امن و ایمنی نا خراب حالیت آتیا رپورٹ اس وزیراعظم آ گدریفینے، رپورٹ ءِ بنجائی وزیر اسد عمر، گورنر سندھ عمران اسماعیل آ ہم گدریفنگانے۔ دارپورٹ 12 پنہ غاتیا تالان ءِ ہرادے او سندھ اٹی امن و ایمنی نا خراب حالیت آتا بارواٹ تینٹ تیار کرینے۔ رپورٹ نا رداٹ تدوک آ مسہ تُو اٹی سکھر ولاڑکانہ ریجن اٹی 250 آن زیات بندغ زوال کرینو۔ حلیم عادل شیخ رپورٹ اٹی آئی جی سندھ ءِ دمدستی اینک کننگ نا خواست ہم کرینے۔ رپورٹ نا رداٹ قبائلی جھیڑہ غاتا سوب آن مسہ تُو اٹی 300آن زیات بندغ ٹھپی مسنو، 70 آن زیات بندغ برمتہ مسنو، 400آن زیات ڈکیتی ریکارڈ مسنے، داریکارڈ نا رداٹ مسہ تُو انا سرجم حوال آک ءُ وخت اس کہ حقیقت اٹ داکان زیات ڈوہ مسنے۔ حلیم عادل شیخ تینا رپورٹ اٹی قبائلی جھیڑہ غاتا ہم ذکر ءِ کرینے و پاننگانے کہ چاچڑ قبیلہ نا دہ بندغ ءِ داڑیل آک کسفیر ہچ ءُ کارروائی اس متو۔ پولیس مقابلہ ٹی داڑیل آک پولیس اے پی سسی ءِ راکیٹ لانچر اٹ شست کرے، داڑیل آتا سم کاری آن مسہ پولیس کارندہ شہید و ٹھپی مسوسر، پولیس اے پی سی گاڈی تے ٹی سم تا داپارایپار مننگ گڑتی نا سوب ءِ، نیب و ایلو ادارہ غاتیان جاست وپاست کرفنگے گاڈی تا ہلنگ اٹ ہراوڑ مس، داعلاقہ غاتے ٹی قبیلہ ئی جھیڑہ غاتا سوب آن سد آ جونک زیان مسنو۔ رپورٹ اٹی پاننگانے کہ 450 آن زیات بندغ داتم اسکان داجھیڑہ غاتیٹی زوال کرینو۔ پیپلزپارٹی نا حکومت آن پد مچ آ سندھ اٹی امن و ایمنی نا حالیت خراب مس۔ 2019ء نا پولیس آرڈرآن پد پولیس نا غٹ کنٹرول سندھ حکومت نا ماتحت تننگا، پیپلزپارٹی نا مخلوق نا پاننگ آ پولیس آفیسر آتے خلنگک۔
