اسلام آباد۔ 27 مئی (اے پی پی) کوویڈ۔ 19 نا دین آن رکھ انا پالیسی زرگزرانی پالیسی ءِ۔ جہانی کہول آ میکرواکنامک و مالیاتی سوگوی بھاز المی ءِ۔ جہانی مالیاتی فنڈ(آئی ایم ایف) تینا اسہ رپورٹ اسے ٹی پارینے کہ جان جوڑی نا ویل آتا چٹفنگ آن بیدس زرگزرانی مشکل آتا چٹفنگ ناممکن ءِ۔ ہنداخاطرآن جہانی کہول آ کورونا دین آن رکھ انا پالیسی مچ آ دنیا نا زرگزرانی پالیسی نا حیثیت تخک۔ مچ آ دنیا نا ملک آک و جہانی ادارہ جان جوڑی، جہانی بینک و گلوبل الائینس فارویکسینز اینڈ ایمونائیزیشن آن بیدس ایلو شریدار جہانی دین آن رکھ اکن خاطرخواہ گام گیج کننگ ءُ۔ کوویڈ۔ 19نا دین انا بناآن اسہ سال آن زیات وخت تدینگ انگ آن پد ہم مچ آ دنیا ٹی دین انا زہمی تا کچ ودنگ ءِ۔ داحالیت آتے ٹی انسانی جان تا رکھ و اقتصادی مشکل آتے کم آن کم کننگ کن دمدستی گام گیج آتا سخت گرج ءِ۔ جہانی ادارہ خبڑدار کرینے کہ جہانی کہول آ زرگزرانی بحالی نا کچ کم مننگ ءِ ہراٹی ہزگار و شون ہلوک ملک آک و نیزگار ملک آتا نیام اٹ ساڑ ی پرخ اٹی پین ودکی نا گڑتی ءِ۔ آئی ایم ایف جہانی برادری آ زور شاغانے کہ کم کٹیا کروک آ نیزگار ملک آک و پدتموک ملک آتے ٹی کورونا دین آن رکھ انا ویکسین نا دوئی کننگ ءِ پک کننگ کن پین گام گیج کیر انتئے کہ جان جوڑی نا ساڑی تنکی نا چٹفنگ آن بیدس اقتصادی ویل آتا چٹنگ ناممکن ءِ۔ ہنداوڑ کوویڈ۔ 19 نا ساڑی آ جہانی حالیت آتے ٹی دین آن رکھ اکن جان جوڑی نا پالیسی داسہ زرگزرانی پالیسی نا درجہ اس اختیار کرینے۔
