اسلام آباد۔ 26 مئی (اے پی پی) وزیراعظم عمران خان پارینے کہ قومی احتساب بیورو(نیب) تحریک انصاف نا دور اقتدار نا مسہ سال اٹی 484ارب روپئی وصول کرینے وخت اس کہ 1999آن 2017ء اسکان بیرہ 290 ارب روپئی نا وصولی مس۔ مسلم لیگ (ن) نا 10 سال انا دور اقتدار اٹ محکمہ انسداد بدعنوانی پنجاب نا کارکڑد مایوس کن ئس، ہراتم حکومت ڈوہدار تا رکھ ءِ کپک و احتساب نا مشینری ءِ بے نیام تمنگ کاریم کننگ نا موقع ایتک تو نتیجہ دوئی مریک۔ چارشنبے نادے آ تینا ٹویٹ آتے ٹی وزیراعظم عمران خان پارے کہ مسلم لیگ (ن) نا دہ سال انا دور اٹی و تحریک انصاف نا دوراقتدار اٹی پنجاب اٹی اینٹی کرپشن نا محکمہ نا کارکڑد اٹی پرخ نمان ءِ۔ اوپارے کہ مسلم لیگ (ن) نا دہ سال انا دور انا مایوس کن کارکڑد آن چپ ساڑی حکومت نا 31 تُو اٹی پنجاب نا محکمہ انسداد بدعنوانی وڈی خور آتیان 220 ارب روپئی پدی ہلک۔ وزیراعظم پارے کہ مسلم لیگ (ن) نا دہ سال انا دور اٹی بیرہ 2 ارب 60 کروڑ روپئی نا ڈغار واگزار کرفنگاسس وخت اس کہ ننا حکومت داتم اسکان 192ارب روپئی نا سرکاری ڈغار واگزار کرفینے۔ مسلم لیگ (ن) نا دور اٹی بیرہ 43 کروڑ روپئی نا مقابلہ ٹی ننا دور اٹی 2 ارب 35 کروڑ روپئی نا کیش ریکوری مسنے۔ داکان بیدس مسلم لیگ (ن) نا دہ سال انا دور اٹی ہچ ءُ بلواسطہ نغد وصولی متنے وخت اس کہ ننا دوراٹی بالواسطہ کیش ریکوری نا کچ داتم اسکان 26 ارب روپئی مسنے۔ وزیراعظم پارے کہ داوڑنا نمان پرخ نیب انا کارکڑد اٹ ہم نظر بریک۔ 1999آن 2017اسکان مروک آ بیرہ 290 ارب روپئی نا وصولی تا برعکس نیب تحریک انصاف نا حکومت نا دور(2018آن 2020) اٹی 484ارب روپئی وصول کرینے۔ وزیراعظم پارے کہ ہراتم حکومت ڈوہدار تے رکھ تف و احتساب نا عمل بیدس نیام تمنگ آن برجاتخے تو نتیجہ دوئی مریک۔
