اسلام آباد۔ 26 مئی (اے پی پی) بنجائی وزیر حوالکاری و شینکاری چوہدری فواد حسین پارینے کہ آخبت اٹ ہموملک آن شون ہلیرہ ہرافتا ورناک ملازمت آن زیات کاروبار آ چکار کیرہ، ننے تینا ادارہ غاتے شون ترسا دنیا تون ہم گرنچ کروئی مریک، سرسہب ورنا پروگرام پاکستان ءِ شونداری ناکنڈآ دننگ نا لائخی تخک، داپروگرام نا سرسہبی پاکستان نا سرسہبی مریک، ساڑی دور اٹی کسب نا اہمیت و قدر مست آن بھاز زیات ءِ، کسب نا کاریم اٹ اتنگ آن شون ہلنگ مریک، پاکستان ءِ شون ہلوک جوڑ کننگ کن کسب نا مون آ دننگ بھاز اہمیت تخک۔ داخیال آتا درشانی ءِ او چارشنبے نادے آ داڑے بحریہ یونیورسٹی ٹی سرسہب ورنا پروگرام نا دود آن تران کرسا کرے۔ دود اٹی وزیراعظم نا خصوصی کمکار امور نوجوانان عثمان ڈار،م نیووٹک نا چیئرمین سید جاوید حسن و وائس چانسلر بحریہ یونیورسٹی ئسک ہم ساڑی ئسر۔ دود آن تران کرسا بنجائی وزیر حوالکاری سرسہب ورنا پروگرام اٹی بشخ ہلوک آتے کورس ءِ پورو کننگ آ مبارکبادی تس۔ اوپارے کہ ٹیکنالوجی دنیا ءِ بدل کرینے، پاکستان اٹی ہم ٹیکنالوجی آن بدلی مریک۔ اوپارے کہ پاکستان نا 60 درسد آبادی نا وئی 30 سال آن کم ءِ، فیس بک، گوگل، پے پال، ٹویٹر لانچ کروک آ ک ہم ورنائسر۔ اومچ آ دنیا ءِ بدل کرسا ہلار۔ ننے پاکستان و تینا زند ءِ بدل کروئی ءِ تو کسب المی ءِ۔ اوپارے کہ بدل مروک دنیا ٹی کسب نا اہمیت مست آن زیات ءِ، اینو آن منہ وخت مست دارواج ئس کہ ڈگری ہلسا ملازمت اختیار کننگاکہ ولے داسہ ملازمت نا جاگہ غا کاروبار نا تصور ودنگ ءِ، ہمو ملک آک مدام سرسہب مریرہ ہرافک کاروباری بندغ ودی کیرہ۔ اوپارے کہ نن کسب نا کاریم اٹ اتنگ آن تینے و دنیا ءِ بدل کننگ کینہ۔ داڑکن ننے شون پسند سوچ ءِ تینا کروئی مریک ہرابدل مروک آ دنیا تون مطابقت تخے۔ ننے دا ہروئی مریک کہ ہرابشخ آتے ٹی زیات گمان ارے۔ اوپارے کہ60 و 70 نا دہائی نا مخلوق زند اٹی بھلو بدلی خنار، کمیونیکیشن نا دور ودنگ ءِ، چندی گڑاتا جاگہ ءِ داسہ ڈیجیٹل ہلکونے، فیکس، کیسٹس و ٹیلکس چٹانو، واٹس ایپ نا بننگ آن ای میل ہم چٹنگ اٹی ءِ۔ اوپارے کہ ورناک تینا معلومداری تے ودفر، دنیا غان آگاہی دوئی کننگے۔ اوپارے کہ ننے تینا ادارہ غاتے بدل مروک دنیا تون ہم گرنچ کروئی مریک تانکہ نن عملی دنیا ٹی مون آ ہِننگ کین۔ بنجائی وزیر پارے کہ سرسہب ورنا پروگرام نا غٹ آن اہم ہیت دادے کہ دا روزگار نا وارخواہی ودی کننگ ءِ، بزغر، لائیو اسٹاک و ٹیکنالوجی تون اوار ایلو بشخ آتون گنڈوک بندغ آک داپروگرام آن فائدہ ہرفنگ کیرہ۔ اوپارے کہ دانا کمک اٹ نن شونداری نا پوسکن ءُ جہت اتنگ کینہ۔
