لیہ۔ 26 مئی (اے پی پی) وزیراعظم نا خصوصی کمکار سیاسی ابلاغ شہبازگل پارینے کہ ساڑی حکومت سویلی پنجاب نا شونداری کن فنڈ آتا فراوانی اتون عملی گام گیج کننگ ءِ، پنجاب نا الس کن انصاف جان جوڑی کارڈ بناءِ کننگ انگ ءِ، جان جوڑی کارڈ بے پرخ جاری کننگک، مستین نا حکومت آک داعلاقہ ءِ گوجالار و الس ءِ خورک ءُ تغ نشان تسر، ننا لیڈر ذہین، خواری کش و ملک و قوم انا وفادار ءِ و اودے غریب آتا دکھ ارے، ہراراج انا نیزگار مخلوق کن ہنکین و لنگرخانہ جوڑ کرے۔ شہباز شریف پنجاب سپیڈ آخا کرپشن سپیڈ پک مس۔ داخیال آتا درشانی ءِ او چارشنبے نادے آ داڑے میڈیا تون گپ وتران کرسا کرے۔ اوپارے کہ مستین اٹ لیہ و سویلی پنجاب ءِ مدام پنجاب نا سیاست اٹ سوداکننگا، داڑے تغ نشان تسر و سوداکننگا، اپوزیشن راہشون سویلی پنجاب تون بیرہ ہمدردی نا درشانی ءِ کرسا کرے ولے تینا دور حکومت اٹ الس کن عملی وڑاٹ ہچ اس کتو۔ داعلاقہ کن 35 درسد بجٹ جتا مسکہ و ہراتم خڑچ کننگاکہ تو او 15 درسد آن 17 درسد نا نیام اٹ چٹارہ۔ تدوک آ ور انا آخیریکو 7 سال اٹی سویلی پنجاب نا 265 ارب روپئی ہراداجاگہ نا حق ئس، اوفتے داکان پین تین گدریفنگا تانکہ منی لانڈرنگ کننگ مرے۔ اوحساب وکتاب پیش کرسا پارے کہ پیپلزپارٹی نا 5 سال انا دور اٹی مسکوہی وزیراعظم یوسف رضاگیلانی لیہ ءِ 1.6ارب روپئی نا ڈٹ تس، اوکان پد مسکوہی وزیراعلیٰ پنجاب ہراتینے پنجاب سپیڈ نا پن تسکہ ولے او شونداری نا جاگہ غا کرپشن نا سپیڈ ءِ ترند کرے۔ شہباز شریف بھلوہیت کریکہ کہ اوداکرے و اے کرے۔ اوتینا آخیریکو 5 سال اٹی لیہ کن 1.7 ارب روپئی تس و پارے کہ نن بھلو کاریم اس کرین و داسہ داپاننگ انگ ءِ کہ ساڑی حکومت ہچ اس کننگ اٹی اف۔ حقیقت اٹ مسکوہی حکومت آک سویلی پنجاب ءِ شونداری نا بیرہ تغ نشان تسر۔ اوپارے کہ ساڑی حکومت نا دور اٹی عملی گام گیج مریک۔ اللہ نا شکر ءِ کہ وزیراعظم عمران خان لیہ کن اِرا بھلو ڈٹ آتا پڑو ءِ کرے۔ دا ملکی تاریخ نا بھلا ڈٹ آتے ٹی اوار ءِ۔
