دیپالپور۔ 26 مئی (اے پی پی) بنجائی وزیر ریلوائی اعظم سواتی ریلوائی ٹریک و ریلوائی اسٹیشن نا انسپکشن کن اسپیشل ٹرین نا کمک اٹ اوکاڑہ غا سرمس۔ وزیر ریلوائی نا اسٹیشن بلڈنگ نا کاریم اٹ اتنگ درست مفننگ آ ناگواری نا درشانی۔ داوخت آ میڈیا تون گپ وتران کرسا بنجائی وزیر اعظم سواتی نا پاننگ ئس کہ مستین نا حکومت آک پوسکن آ ماڈل ریلوائی اسٹیشن نا ارب آ روپئی آن بے مسخت ماڑی تفسا خزانہ ءِ زیان کریرہندن ءُ ماڑی تفنگا ہرافتا ریلوائی نظام تون ہچ ءُ تعلق اس الوکہ، عجلت اٹ مستین نا حکومت آتے ٹی بے پورو ڈٹ آتا بناءِ کننگا، اونا پاننگ ئس کہ ماڑی ءِ خنسا است ہسون مننگ ءِ، است کیک دا ماڑی تے یونیورسٹی یا تعلیمی ادارہ غاتا دوٹی تننگے۔ داوخت آ میڈیا ہشت سال آن بند ریلوائی کراسنگ ءِ ملنگ اسٹیشن نا مارکیٹ کِرا غا تننگ کن ریزروپرائس کم کننگ پلیٹ فارم نمبر اسٹ آن ارٹ اسکان ہِننگ کن پول تفنگ و ایلو ویل آتا ایسر کننگ نا کنڈآ چکار مبذول کرفے ہراڑآ بنجائی وزیر ویل آتے دمدستی ایسر کننگ نا باوری کرفے۔ بنجائی وزیر سیاسی گپ وتران آن پاناد کرسا سیاسی سوج آتا ورندی آن پاناد کرے ولے اونا پاننگ ئس کہ پی ڈی ایم تینا سیاسی مرک اٹ کسکونے۔
