اسلام آباد۔ 26 مئی (اے پی پی) وزیر مملکت حوالکاری و شینکاری فرخ حبیب تون متحدہ عرب امارات (یواے ای) نا سفیر عماد عبید ابراہیم الزابی اوڑدہی کرے ہراٹی میڈیا نا بشخ اٹی کمک، سیل و سوات، واپار و چاگڑدی بدلی تتون اوار تین پہ تینی است خواہی نا باندات آ گپ وتران کننگا۔ وزیر مملکت حوالکاری و شینکاری فرخ حبیب پارے کہ گرین ڈپلومیسی ملک آتا نیام اٹ ہڑتوم آ کنڈآتا تعلقداری ءِ مون آ دننگ نا پوسکن ءُ کسر فراوان کیک۔ اوپارے کہ متحدہ عرب امارات و پاکستان تین پہ تینی پت آ مبنی خوشگوار تعلقداری تیان فائدہ ہرفنگ ءِ۔ متحدہ عرب امارات پاکستانی تیکن ایلو اُراغانبار ءِ۔ اوڑدہی ٹی داہیت آ امنا کننگاکہ ہڑتوم آ ملک آتا نیام اٹ ہڑتوم آ کنڈآتا واپار نا بھلو گمان اس ساڑی ءِ ہرافتے کاریم اٹ اتنگ نا گرج ءِ۔ وزیر مملکت ٹیکسٹائل و گارمنٹس نا صنعت اٹ کاروباری لائخی تا مون آ دننگ کن یو اے ای نا سفیر الزابی نا فیصل آباد نا دورہ نا ستاءِ کرے۔ وزیر مملکت فرخ حبیب یواے ای نا سفیر ءِ معلومدار کرے کہ پاکستان نا کشاری مصنوعات مچ آ دنیا ٹی پنی ءُ، پاکستانی پوریاگرآتا کمک اٹ داگڑاتے دے ٹک نیامی نا مارکیٹ آتسکان رسینگ ملنگ آن شونداری نا پوسکن وارخواہی دوبریک۔ کڑدہ غاک ہڑتوم آ ملک آتا سرکاری نیوز ایجنسی تا نیام اٹ کمکاری ءِ ودفنگ آ امنا کریر۔ داڑآن ہڑتوم آ ملک آتا نیام اٹ آجومعلومداری نا فراوانی و اسہ ایلو نا دودوربیدگ ءِ پہہ مننگ اٹ کمک رسینگک۔ وزیر مملکت حوالکاری و شینکاری فرخ حبیب پارے کہ وزیراعظم عمران خان نا کماشی ٹی پاکستان زرگزران شونداری نا کنڈآ ہِننگ ءِ، کوویڈ۔ 19 آن پد ہم زرمبادلہ نا کوڑی، برآمد و ترسیلات زراٹی ریکارڈ ودکی مسنے، اوورسیز پاکستانیک بھاز کم مد اٹ روشن ڈیجیٹل اکاؤنٹ اٹ اسہ بلین ڈالر مون تسر ہراکہ ساڑی حکومت آ پت انا درشانی ءِ، متحدہ عرب امارات اٹی 15 لکھ پاکستانی کاریم کننگ ءُ۔ یو اے ای نا سفیر متحدہ عرب امارات نا شونداری ٹی پاکستانی تا کمکاری نا ستاءِ کرے۔ وزیر مملکت سفیر ءِ راجی رکھ پروگرام اٹ پاکستان نا حکومت نا چندی گام گیج آتا بارواٹ معلومدار کرے۔ یواے ای نا سفیر وزیر مملکت ءِ معلومدار کرے کہ ایکسپو2020ء ٹی پاکستانی پورویاگرتا بشخ ہلنگ آن کاروبار اٹی شونداری و مچ آ دنیا نا پوریاگر آتون رابطہ نا موقع ملک۔ وزیرمملکت حوالکاری و شینکاری فرخ حبیب پارے کہ پاکستان و متحدہ عرب امارات نا نیام اٹ تعلقداری تے 50 سال پورو مننگ ہڑتوم آ ایلم ملک آتے کن اسہ مزل نا نشان ءِ، 50 سال انا تعلقداری تا دود آتے اواری اٹ اڈ ایتنہ۔ اوولی عہد شہزادہ ابوظہبی شیخ محمد بن زید بن سلطان النہیان کن نیک است خواہی نا درشانی ءِ کرے۔ وزیر مملکت ہڑتوم آ ملک آتا مخلوق اٹ سوگو رابطہ، میڈیا و ڈل و سول سوسائٹی ڈل آتا تین پہ تینی ہن و برنا گرج آ زور شاغا۔
