اقوام متحدہ۔ 26 مئی (اے پی پی) اقوام متحدہ نا اقتصادی و راجی کونسل (ای سی او ایس او سی) نا صدر و اقوام متحدہ ٹی پاکستان نا آخبتی مندوب منیر اکرم زور شاغانے کہ کورونا دین آن زہمی بے کچ غریب ملک آتے کن قومی و جہانی کہول آمالیاتی میکانزم ءِ سوگو کننگ نا گرج ءِ۔ اوبروک آ سال جنوری ٹی قطر نا دارالحکومت دوحہ ٹی غٹ آن کم پدتموک ملک (ایل ڈی سی) آ اقوام متحدہ نا اڈہلوک آ 5 می کانفرنس کن تیاری کروک آ کمیٹی نا دیوان اٹی پارے کہ ایل ڈی سی آ چکار وختی ءِ۔ اواومیت ظاہر کرے کہ کمیٹی نزور پدتموک ملک آتے ٹی سوگو شونداری، سوگو بحالی و شونداری نا گام گیج آتے کن امنائی سلاہ نا دوئی کننگ اٹ سرسہب مریک۔ اوکمیٹی نا دیوان اٹی پارے کہ دنیا نا اسہ ملک اس ہم کورونا دین آن رکھ اف ولے دادین آن پدتموک ملک آک غٹ آن زیات زہمی مسنو ہراشونداری کن ممکنہ وڑاٹ پدریسہ کوشست کننگ ءُ، ہراڑکن اوفتے پدریسہ کمک نا گرج ءِ۔ کم شون ہلوک ملک آتے کورونا دین آن بچفنگ کن ویکسین نا 1.3ارب خور آتا گرج ءِ ولے ویکسی نیشن نا ساڑی 2 درسد آن کم کچ اتون ویکسین نا تیاری و سپلائی ءِ دمدستی وڑاٹ ودفنگ نا گرج ءِ۔ رعایتی نہاد آ دمدستی امنا کیر و جہانی ادارہ جان جوڑی نا کورونا ویکسین نا فراوانی کن بناکروک آ پروگرام ءِ ویکس انا رداٹ ویکسین فراوان کننگا ولے دا چرجوئی ٹی 19 ارب ڈالر نا فنڈ جاری کننگتنے۔ اوپارے کہ کم شون ہلوک ملک آتا کم و ود 39 درسد آبادی ٹی جم نیزگاری 2.4 درسد ودکی مسنے ہرانا مطلب داکہ غریبی ٹی کمتی اتنگ کن براہ راست نغد امداد نا پروگرام، راجی رکھ انا نیٹ ورک و خلقی نیزگاری نا چٹفنگ نا کوشست آتادمدستی گرج ءِ۔ اوباضابطہ شونداری ٹی کمک(اوڈی اے) نا قول آتے پورو کننگ،مالی کمک، وام تا منسوخی و تشکیل نو، ورلڈ بینک و جہانی مالیاتی فنڈ انا کنڈآن پین کمک و پوسکن آ ایس ڈی آر کن جتا 650 ارب ڈالر آن ودکی خڑچ آتا گرج آ زور شاغا نیز کورونا تنکی آن گچین وڑاٹ بحالی کن پائیدار انفراسٹرکچر اٹ زرکاری ٹی ودکی کروئی مریک ہرا پائیدار شونداری ہدف آتے کن بھاز المی ءِ۔ پاکستانی مندوب منیر اکرم پارے کہ بریبری شونداری نا کسر اٹ بروک آ اڑاند آتے ہم مر کروئی مریک وخت اس کہ اسہ جامع مالیاتی فن تعمیر، شونداری آ مبنی جہانی واپاری نظام و اسہ منصفانہ جہانی خراج نظام ءِ عملی دروشم اس تننگے و داڑتون اوار اوار زرانا غیر کانودی گدریفنگ ءِ توننگ و سائنس، ٹیکنالوجی ٹی شونداری و جدت پسندی کن جامع جہانی کمکاری بھاز اہم ءِ۔ بروک آ سال جنوری ٹی اڈ ہلوک آ داکانفرنس اٹی مچ آ دنیانا ملک آتا سروک آک بشخ ہلیرہ۔
