اسلام آباد۔ 26 مئی (اے پی پی) وزیراعظم نا خصوصی کمکار امور نوجوانان عثمان ڈار پارینے کہ ورناتے تینا کاروبار اس بناکننگ کن آسراتی تننگ انگ ءِ، سرسہب ورنا پروگرام نا رداٹ ورناتے کسبکار کننگ انگ ءِ، پروگرام اٹی شفافیت ءِ پک کننگ انگ ءِ، ورناتے روزگار تننگ کن حکومت آئی ٹی نا بشخ آ کاریم کننگ ءِ، حکومت نا سلابت اٹ چندی پروگرام تے اتنگ اُن، کورونا دین انا تنکی نا سوب آن سرسہب ورنا پروگرام اٹ اڑاندبس ولے حکومت ورناتا راجی آسودہی کن ڈٹ آتے برجاتخا۔ داخیال آتا درشانی ءِ اوچارشنبے نادے آ داڑے سرسہب ورنا پروگرام نا بابت اڈہلوک آ دود آن تران کرسا کرے۔ اوپارے کہ سرسہب ورناپروگرام آن لائن بیرہ داخاطرآن تخانن کہ داٹی شفافیت مرے، داپروگرام اٹی مینوئل درخواست تننگ مفک، کاروبار کننگ کن ویب سائٹ آ ہنسا وام اکن درخواست تننگ مریک۔ اوپارے کہ اولیکو کچ اسٹ آن دہ لکھ روپئی نا وام انا ئس ہراڑآ 3 درسد مارک اپ تخنگا، داسہ وام انا حد ءِ ودفسا 20 لکھ کننگ انگءِ، کوشست کننگ اُن کہ ہموورنا ہرافتے تون کسب و آزموندہ ارے، کن جولائی نا اولیکو ہفتہ غان دانا بناءِ کننگے، داڑآن ورناک تینا چنکو کاروباراس بنا کننگ کیرہ۔ اوپارے کہ اینو ہرا بھلا برانڈ آک ءُ اوفک چنکو کچ اسے آ کاریم نا بناءِ کریسر، وخت اتون اوار اوار دابھلو بھلو برانڈ مرسا کریر۔ اوورناتے پارے کہ نمے چنکو کاروبار اسے آن بناکننگ ءِ بھلو تغ خننگ و لگن اٹ کاریم کننگ ءِ۔ اوپارے کہ گرج داہیت انا ءِ کہ تینا ذہن ءِ بدل کننگے کہ کاروبار نا کنڈآ بروئی ءِ۔ ہموورناک ہرا یونیورسٹی نا تعلیم کرینو اوفتے مرے کہ او داپروگرام آن فائدہ ہرفسا کاروبار اس بناکیر۔ اوپارے کہ اگہ سرسہب ورنا پروگرام اگہ دہ ہزار مخلوق ءِ چیک تسنے تو دانا مطلب ءِ کہ دہ ہزار ورناتے روزگار رسینگانے و ہمودہ ہزار ورناپین دہ ہزار کن روزگار نا ورارخواہی ودی کرینو۔ اوپارے کہ ہراتم ڈیش بورڈ ءِ پبلک کننگے تو معلوم مریک کہ 20 ہزار مخلوق داتم اسکان براہ راست سرسہب ورنا پروگرام آن روزگار دوئی کرینو۔ نم سرسہب ورناپروگرام نا بشخ مبو، یونیورسٹی ٹی تعلیم اٹی ہی تینا ذہن ءِ جوڑ کبو کہ کاروبار کروئی ءِ۔ نمے باور کرفیوہ کہ کنا کوشست ءِ کہ ہڑدے ئی بنداو آ حساب وکتاب نا جاچ ءِ ہلنگے و بینک آتون رابطہ تخنگک تانکہ ہراورناک اپلائی کرینو اوفتے زوت آن زوت لون ملنگ کے۔ اوپارے کہ 20 ورناتے اسلام آباد اٹی اپرنٹس شپ کرفنگ اُن داکچ ءِ ودفوئی ءِ، داکان بیدس بھاز پین ڈٹ آتیاہم کاریم برجاءِ۔ اوپارے کہ وزیراعظم عمران خان نا خواری ٹی زرگزرانی ٹی گچینی بننگ ءِ، ملک انا زرگزران ہرامہالو تباہ ئس داسہ گچینی نا کنڈآ ہِننگ ءِ۔ اوپارے کہ حکومت نا زمواری ءِ کہ کاروبار کن چاگڑد اس ودی کننگے۔ اوپارے کہ کنا زالبول آتے کن کلہو ءِ کہ ہراتم اسکان نم مون آ بفیرے تو پاکستان شون ہلنگ کپک، ہراتم اسکان پاکستان نا شونداری و شونہالی ٹی پاکستان نا مسن تا بشخ مفک تو پاکستان مون آ ہِننگ کپک۔ وزیراعظم عمران خان 100 ارب روپئی آن 25 ارب روپئی زالبول آتے تخانے۔
