اسلام آباد۔ 26 مئی (اے پی پی) کوویڈ۔ 19 نا جہانی دین انا مون ءِ توننگ نا گام گیج آتے کن 50 ارب ڈالر نا گرج ءِ۔ جہانی مالیاتی فنڈ (آئی ایم ایف) جہانی کہول آ اقتصادی گچینی کن جان جوڑی نا تنکی نا چٹفنگ کن مچ آ دنیا ٹی گرانٹ، حکومتی وسیلہ و صاحب ثروت بندغ و ہزار ملک آتیا زور شاغانے کہ کورونا دین آن رکھ و جہانی زرگزرانی حالیت آتے ٹی گچینی کن کم از کم 50 ارب ڈالر نا وسیلہ غاتا دوئی ءِ پک کننگے۔ سلاہ نا ملک آک دازرآن اینخو سال 2021ء نا ایسر اسکان مچ آ دنیا نا غٹ ملک آتے ٹی کم از کم 40 درسد آبادی ءِ کوویڈ۔ 19 آن رکھ اکن ویکسین خلنگے۔ داکان بیدس بروک آسال 2022ء نا اولیکو شش تُو اٹی 60 درسد جہانی آبادی نا ویکسین ءِ پک کننگ نا گرج ءِ۔ سلاہ ٹی پاننگانے کہ زیات آن زیات جہانی آبادی ءِ کورونا دین آن رکھ انا ویکسین خلسا زرگزرانی و جان جوڑی نا نسخان تے کم آن کم کننگ اٹ کمک دوئی مریک۔ داکان بیدس جہانی ادارہ تینا سلاہ ٹی پارینے کہ کورونا دین انا تنکی ءِ کچ اٹ کننگ کن مرض انا تشخیص نا نظام ءِ ہم گچین کننگ نا گرج ءِ، و ویکسین نا کم کچ والا ملک آتے کن ودکی وسیلہ غاتا دوئی کننگ ءِ ہم بنداوی اہمیت نا اہمیت ءِ۔ آئی ایم ایف سلاہ کرینے کہ رکھ انا حکمت عملی نا رداٹ بیرہ زر یا وسیلہ غاتا فراوانی نا قول آتیان چپ مون آ ہنسا عملی گام گیج نا گرج ءِ۔ مالی وسیلہ غاتا فراوانی آن بید س ویکسین نا عطیہ غاتا فراوانی و رسک انا چٹفنگ نا زرکاری نا مون آ دننگ آن کورونا دین انا جہانی تنکی نا شدت ءِ کم آن کم کننگ مریک۔
