کوئٹہ۔ 26مئی (اے پی پی) وزیراعلیٰ بلوچستان جام کمال خان تون چیئرمین ون مین کمیشن ڈاکٹر شعیب سڈل نا قومی اسمبلی نا باسک ڈاکٹر رمیش کمار تون اوار اوڑدہی کرے۔ اوڑدہی ٹی صوبہ ٹی اقلیتی برادری نا راجی آسراتی، ہنگلاج ماتا مندر نا گچینی تون اوار صوبہ ٹی مذہبی سیل و سوات نا مون آ دننگ آ گپ وتران کننگا۔ وزیراعلیٰ بلوچستان جام کمال خان پارے کہ اقلیت آتا بلوچستان نا شونداری و شونہالی ٹی مدام اہم کڑد مسنے۔ صوبائی حکومت اقلیت آتا حق انا رکھ و اوفتا راجی آسراتی ءِ خاص اہمیت ایتک۔ اوپارے کہ سرکاری ملازمت آتے ٹی اقلیت آتے کن جتا پنچ درسد کوٹہ غا عملدرآمد ءِ پک کننگانے۔ وزیر اعلیٰ بلوچستان جام کمال خان مستی پارے کہ اقلیتی برادری نا عبادت گاہ و اوفتا راجی و زرگزرانی شونداری نا ڈٹ آتے کن گام گیج کننگ انگ ءِ۔ وزیراعلیٰ بلوچستان اوڑدہی ٹی چیئرمین ون مین کمیشن ڈاکٹر شعیب سڈل پارے کہ ساڑی حکومت نا بلوچستان اٹی بین المذاہب ہم آہنگی و اقلیت آتے کن چست کروک آ گام گیج بے مٹ ءِ۔
