اسلام آباد۔25مئی (اے پی پی): مزن وزیر عمران خان ءَ ورنا آنی واستہ روزگار ءِ دو پروگرام سہرا کنگ ءِ جار جنان ءَ گوشت کہ بلدکاری ءِ زانشت ءِ واستہ یک لکھ 70 ہزار سکالرشپس دیگ بیت، 50 ہزار سکالرشپس جدید ٹیکنالوجی ءِ واستہ دیگ بیت، کامیات ورنا پروگرام ءِ چیر دستی ءَ کاروبار ءِ واستہ 100 ارب کلدار ءِ وام میرٹ ءِ سر ءَ دیگ بیت، ھمک سال ورنا آنی واستہ فنڈ آنی تہ ءَ گیشی کنگ بیت۔ آئی ءَ اے ھیالانی درشانی سئے شمبے ءِ روچ ءَ ادا ورنا آنی واستہ ویڈیو کلوہ ءَ کت۔ مزن وزیر ءَ گوشت کہ ورنا آنی واھشت بیت کہ آ سرکاری مزوری بکن انت بلے حکومت ءِ واستہ توامیں ورنا آناں سرکاری مزوری پجاری کنگ بوت نہ کنت، پیسر ءَ چہ سرکاری مزور آنی کساس گیش انت ءُ پینشن ءِ بوج سر ءَ انت۔ پدا ھم حکومت اے رد ءَ ھم روزگار ءِ پروگرام سہرا کنگ ءَ انت۔ سرجمیں ملک ءَ روزگار پرائیویٹ ادارگ آنی تہ ءَ رسیت۔ یا مردم وتی کاروبار بندات کناں، کسانیں ءُ درنیامی درجگ ءِ کارخانہ جنگ بوت کنت۔ سٹارٹ اپس ءَ نوکٰں آئیڈیاز ءِ چیر دستی ءَ آمدنی ءَ گیشی کنگ بوت کنت، اے رد ءَ حکومت دو پروگرام آرگ ءَ انت۔ بلدکار آنی وانگ ءُ زانگ ءِ واستہ یک لکھ 70 ہزار سکالرشپس دیگ بیت۔ ایشی ءَ چہ ورنا آناں ھیل کاری دیگ بیت ایشی ءَ چہ یک سالے ءِ اندر ءَ 50 ہزار سکالرشپس جدید ٹیکنالوجی ءِ ھوالگ ءَ بنت ایشانی تہ ءَ وت جوڑیشتی ھیل کاری ءُ بینک ڈیٹا وغیرہ ھوار انت، شش شش ماہ ءِ کورسز آں چہ پد ورنا آناں انچیں مزوری رسیت کہ ایشانی بابت ءَ ورنا آں سسا نہ کتگ بوتگ۔ دگنیا ترندی ءِ گوما ٹیکنالوجی ءِ آشوب ءِ نیمگ ءَ جنزگ ءَ انت، مزن وزیر ءَ گوشت کہ اگاں اورنا آنی کرا وتی کاروبار ءِ بندات کنگ ءَ اگاں آئیڈیاز بہ بیت ءُ آوانی کرا مالی آسراتی مہ بیت گڈا ایشی ءِ واستہ 100 ارب کلدار گیشینگ بوتگ ایشاں چہ کامیات ورنا پروگرام ءِ چیر دستی ءَ ورنا آناں وام دیگ بیت ایشاں چہ ورنا وتی دُکان ءِ پچ کنگ بہ لوٹاں گڈا کت بکن انت۔ ایشی ءِ واستہ میرٹ ءِ سر ءَ وام دیگ بیت۔ درستاں چہ گیش فنڈز اے مول ءُ مراد ءِ واستہ ما گیشینتگ انت تانکہ ورنا وت وتی کاروبار ءِ بندات بکن انت ءُ وتی پاد آنی سر ءَ وت بہ اوشت انت۔ ھمک سال اے ھوالگ ءَ فنڈز آنی تہ ءَ گیشی کنگ بیت تانکہ گیشاں چہ گیش ورنا آناں سیت بہ رسیت۔ مزن وزیر ءَ گوشت کہ مئے کوشست انت کہ ورنا آناں وت روزگار بہ رس ایت ءُ اے ملک ءِ دیمروئی ءَ ھم وتی کرد ءَ پیلو کت بکن انت۔ امیت انت کہ سکل ایجوکیشن ءُکامیات ورنا پروگرام ءِ چیر دستی ءَ وام آں چہ ورنا ھم گیشاں چہ گیش سیت چست بکن انت۔
