اسلام آباد۔ 25 مئی (اے پی پی) وزیراعظم عمران خان ورناتے کن روزگار نا اِراپروگرام درستی راستی کرفنگ نا پڑو ءِ کرسا پارینے کہ کسبکاری نا تعلیم کن اسہ لکھ 70 ہزار اسکالرشپ تننگک، 50 ہزار اسکالر شپ پوسکن آ ٹیکنالوجی تیکن تننگک، سرسہب ورناپروگرام نا رداٹ کاروبار کن 100 ارب روپئی نا وام میرٹ آ ایتنہ، ہرسال ورناتے کن فنڈاٹی ودکی کننگک۔ اوداخیال آتا درشانی ءِ سے شنبے نادے آ داڑے ورناتیکن اہم ویڈیو کلہو اٹی کرے۔ وزیراعظم پارے کہ ورناتا خواہش مریک کہ اوفتے سرکاری ملازمت ملے ولے حکومت کن غٹ ورناتے سرکاری ملازم تننگ ممکن اف۔ مہالو آن سرکاری ملازم آتا کچ زیات ءِ و پینشن نا بل ودنگ ءِ۔ ولے حکومت دا چرجوئی ٹی ہم روزگار نا پروگرام درستی راستی کرفنگ ءِ، مچ آ ملک اٹی روزگار نجی بشخ اٹی دوئی مریک یا تو مخلوق تینٹ تینا کاروبار نا بناءِ کیک۔ چنکو و نیامی درجہ نا صنعت خلنگ مریک۔ سٹارٹ اپس اٹ پوسکن آ آئیڈیا تارداٹ کٹیا ٹی ودکی کننگ مریک۔ داچرجوئی ٹی حکومت اِراپروگرام اتنگ ءِ۔ کسبکاری نا تعلیم کن اسہ لکھ 70 ہزار اسکالرشپ تننگک۔ داڑآن ورنناتے کسبکاری نا تربیت تننگک دافتیان اسہ سال اٹی 50 ہزار اسکالر شپ پوسکن آ ٹیکنالوجی نا بابت مریرہ ہرافتے ٹی مصنوعی ذہانت و بینک ڈیٹا پین پین اوار ءِ، شش شش تُو انا کورس آتیان پد ورناتے ہندن ءُ ملازمت ملک ہرافتا بارواٹ ورناک سجفپرور ہم۔ دنیا ترندی اٹ ٹیکنالوجی نا انقلاب نا کنڈآ ہِننگ ءِ، وزیراعظم پارے کہ اگہ ورناتتون تینا کاروبار اس بناکننگ نا آئیڈیا ارے و اوفتے تون وسیلہ اف تو اوڑکن 100 ارب روپئی جتا کننگانے ہرافتیان سرسہب ورناپروگرام نا رداٹ ورناتے وام تننگک ہرافتیان ورناک تینکن دوکان اس ملنگ خوار یا پین کاروبار اس کننگ خوار تو اوکاروبار کننگ کیرہ، داڑکن میرٹ آ وام تننگک۔ غٹ آن زیات فنڈ دامسخت کن نن جتا کرینن تانکہ ورناک تینٹ تینکن کاروبار اس بناکننگ کیر و تینا نت تیا سلنگ کیر۔ ہرسال داچرجوئی ٹی فنڈآتے ٹی ودکی کننگک تانکہ زیات آن زیات ورناتے فائدہ تننگ مرے۔وزیراعظم پارے کہ ننا کوشست ءِ کہ ورناتے ہم تینٹ ہم روزگار ملے و داملک انا شونداری ٹی ہم تینا کڑد ءِ ادا کننگ کیر۔ اومیت ءِ کہ سکل ایجوکیشن و سرسہب ورناپروگرام نا رداٹ وام تیان ورناک پبی فائدہ ہرفرہ۔
