اسلام آباد۔ 25 مئی (اے پی پی) بنجائی حکومت نا کنڈآن لس گچین کاری تے شفاف کننگ و پوسکن آ ٹیکنالوجی ءِ کاریم اٹ اتنگ ءِ پک کننگ کن الیکٹرانک وونٹنگ مشین تے درستی راستی کرفنگ آ ترندی اٹ کاریم برجاءِ، الیکشن کمیشن ءِ 31 مئی اسکان ہندی کہول آ جوڑ کروک آ الیکٹرانک وونٹنگ مشین نا ڈیموہم تننگک۔ حوالی نا رداٹ حکومتی آرڈیننس آن پد الیکٹرانک وونٹنگ مشین تا گچین کاری تا کسر اٹ بروک غٹ اڑاند آک مرمسنو داڑکن داسہ حکومت ءِ سادہ اکثریت اٹ اسہ کانود اس جوڑ کروئی مریک ہراڑکن حکومت سنجیدہ ءِ و او دارداٹ پبی گام گیج کننگ ءِ۔ الیکٹرانک وونٹنگ مشین تا خاصیت دادے کہ اوفتا کاریم اٹ اتنگ کن اسہ جاگہ اس ہم انٹرنیٹ نا ضرورت مفک دا مشینک چارج ایبل ءُ و ہراڑے بجلی مف ہموڑے ہم دا مشینک کاریم کیرہ۔ دا مشین نا وزن بھاز کم و دانا ات و در بھاز آسان ءِ۔ الیکشن کمیشن ہم گچین کاری تیٹی پوسکن آ ٹیکنالوجی نا کاریم اٹ اتنگ نا خیرمقدم ءِ کرسا تعلقدار وزارت آن الیکٹرانک وونٹنگ مشین نا ڈیموءِ بٹنگانے۔ دا ڈیمو 31 مئی آن پد تننگک الیکشن کمیشن نا منظوری آن پد مسہ لکھ اسکان دا ای وی مشین تے تیار کننگک۔ دامشین تا خاص ہیت دادے کہ وونٹ بٹوک آءِ اونا رسید ہم فراوان کیک۔ الیکٹرانک وونٹنگ مشین نا ماڈل پارلیمنٹ ہاؤس نا گیٹ نمبر 1 آ ہم خلنگانے تانکہ پارلیمنٹ نا باسک آتے ہم داڑآن آگاہی تننگ مرے۔
