اسلام آباد۔ 25 مئی (اے پی پی) وزیر مملکت حوالکاری و شینکاری فرخ حبیب پارینے کہ بے نظیر انکم سپورٹ پروگرام ءِ پیپلزپارٹی وڈی خوری کن کاریم اٹ ایس، ہنداسوب آن بے نظیر انکم سپورٹ پرگرام وڈی خوری نا علامت جوڑ مس، پیپلزپارٹی نا دور حکومت اٹ 8 لکھ 50 ہزار غیر حقدار مخلوق ءِ اوار کرے، ساڑی حکومت ٹیکنالوجی نا کمک اٹ جانچ پڑتال آن پد بے نظیر انکم سپورٹ پروگرام نا لڑآن 0.85ملین غیر حقدار مخلوق ءِ کشا، داٹی گریڈ 17 آن 21 نا آفیسر آک ہم اوار ئسر۔ سے شنبے نادے آ وزیر مملکت حوالکاری و شینکاری فرخ حبیب بلاول زرداری نا بیان آ ردعمل اٹ پارے کہ بلاول صاحب، اگہ دروغ تڑسا دم درینگے تو اسہ منٹ اکن سچ ءِ بنے، بے نظیر انکم سپورٹ پروگرام نا پن ہمودے، اوٹی ہچ ءُ بدلی اس کننگتنے۔ اوپارے کہ عمران خان راجی رکھ انا پوسکن آ ڈٹ آتا بناءِ کرے۔ احساس نا چھتری نا کیرغ آن قومی کہول آ احساس کفالت، بچت اکاؤنٹ، ایمرجنسی کیش، اسکالرشپ، بے سود وام و کفالت خصوصی پروگرام ئسک ءُ، خاص انگا ضلع غاتے ٹی افراد، نشوونما، کٹیا، لنگرخانہ، کس اس لنگڑ خاچپ پروگرام ءِ، پائلٹ پروجیکٹ نا وڑاٹ یوٹیلیٹی اسٹور رعایت، ریڑھی بان، کریانہ اسٹور رعایت و رکھ پروگرامک چلینگ انگ ءُ۔ اوپرے کہ کورونا ٹی احساس ایمرجنسی کیش انا 31 درسد سندھ اٹی بشخنگا ہراکہ ہرصوبہ غان غٹ آن زیات کچ ءِ، داغٹ راجی رکھ انا پروگرام تے السی است بڈی دوئی و بھرمک حقدار اسکان سرمننگ ءُ۔ اوپارے کہ احساس راجی رکھ انا اولیکو پروگرام ءِ ہرا بیدس نیام تمنگ آن چلینگ انگ ءِ، داٹی ٹیکنالوجی ءِ کاریم اٹ اتنگانے۔ اوپارے کہ راجی رکھ انا داپروگرام ناورلڈ بینک و ایلو جہانی بینک ستاءِ کرینو، راجی رکھ انا دا پروگرام عمران خان نا ریاست مدینہ وژن نارداٹ تیار کننگانے، ہرانا مسخت لس بندغ و اختہ مروک آ تپہ نا زمواریءِ ہلنگے۔
