کوئٹہ۔ 25 مئی (اے پی پی) احتساب عدالت کوئٹہ صوبہ بلوچستان نا تاریخ نا بھاز بھلو کرپشن کیس اسے ٹی فیصلہءِ بنفسا مسکوہی سیکرٹری خزانہ مشتاق رئیسانی و مسکوہی سلاہکار خزانہ خالد لانگو ءِ جم وڑاٹ دُوانزدہ ءُ نیم سال قید انا سزا بنفے وخت اس کہ دوبہ دار آتا کنڈآن کرپشن کرسا جوڑ کروک آ ارب آ روپئی نا منقولہ و غیر منقولہ میرات آتے ضبط کرسا سرکاری خزانہ ٹی جمع کرفنگ نا ہم پرمان جاری کننگا۔ ترجمان نیب بلوچستان نا رداٹ قومی احتساب بیورو نا چیئرمین جسٹس جاوید اقبال نا پارت آ نیب بلوچستان محکمہ لوکل گورنمنٹ و خزانہ بلوچستان نا آفیسر و سلاہکار خزانہ نا اواری اٹ ارب آ روپئی نا کرپشن کیس انا جاست وپاست نا بناءِ کرے تو پت پاش مس کہ مسکوہی سیکرٹری خزانہ بلوچستان مشتاق رئیسانی مسکوہی سلاہکار خزانہ خالد لانگو تون ساز باز کرسا غیر کانودی وڑاٹ اِرا میونسپل کمیٹی خالد آباد و مچھ ءِ اِراارب 34 کروڑ روپئی جاری کرسا اِرا ارب 25 کروڑ نا غبن کریر۔ داکان پد پین چشم کشا انکشاف مون آ بننگ آ مسکوہی سیکرٹری خزانہ بلوچستان مشتاق رئیسانی نا اُراغا کانود نا رداٹ چھاپہ خلنگا ہراڑے موقع غا کم وود 80 کروڑ (ساڑی آ مالیت) لوکل و فارن کرنسی دوئی مس وخت اس کہ 3 کلو 3 سد گرام خیسن کوزہ ٹی ہلنگا۔ ہرانا قومی میڈیا نئے بیرہ براہ راست کوریج کرے بلکن وڈی خوری نا شاہدی تے قوم انا مون آ اتنگا۔ ترجمان نیب بلوچستان نا رداٹ راستکی تا مون آ بننگ آ خالد لانگو نا فرنٹ مین و شریک دوبہ دار سہیل مجید شاہ جرم ءِ امنا کرسا نغڑدوک شرفدار آ عدالت نا توثیق اٹ 96 کروڑ روپئی سرکارءِ پدی جمع کرفے، جاست وپاست اٹی سلیم شاہ و اونا بے نامی دارآتیان ڈی ایچ اے کراچی نا یانزدہ جائیداد آتا حالیت اٹ اسہ ارب روپئی نا ریکوری کننگا۔ شریک دوبہ دار طارق و ندیم اقبال آن اسہ کروڑ و 30 لکھ روپئی وصول کننگا وخت اس کہ مسکوہی سیکرٹری خزانہ نا کنڈآن بلی بارگین نا درخواست ءِ نیب انا کنڈآن مسترد کننگا۔ قومی احتساب بیورو نا چیئرمین جسٹس جاوید اقبال نا پارت آ نیب بلوچستان نا جاست وپاستی ٹیم دے و نن خواری کرسا بلوچستان نا تاریخ نا کرپشن نا بھلا کیس اٹی دوبہ دار آتا برخلاف پبی شاہدی تے مون آ تخسا ریفرنس احتساب عدالت اٹ دائر کرے۔ احتساب عدالت چندی سماعت آتیان پد نیب انا جاست وپاست و دلیل آتے مون آتخسا مسکوہی سیکرٹری خزانہ مشتاق رئیسانیءِ دہ سال قید وخت اس کہ سلاہکار خزانہ خالد لانگو ءِ 26تُو انا قید انا سزا بنفے وخت اس کہ شرفدار آ عدالت دوبہ دار مشتاق رئیسانی نا اُراغان دوئی مروک آ کم و ود 80 کروڑ روپئی نا ضبطگی نا پرمان کرسا دوبہ دارآتا ارب آ روپئی نا کوئٹہ و کراچی ٹی جوڑ کروک آ جائیداد آتون اوار اوار منقولہ و غیر منقولہ میرات آتے ضبط کننگ نا پرمان ہم جاری کننگا۔ شرفدار آ عدالت نا فیصلہ غان پد احتساب نا کانود نا شق 15 نار داٹ دوبہ دار آتے دہ سال اکن ہروڑنا عہدہ کن نابود کوگوندنگا۔ قومی احتساب بیورونا چیئرمین جسٹس جاوید اقبال نیب بلوچستان نا کارکڑد نا ستءِ کرسا پارے کہ نیب میگا کرپشن نا مقدمہ غاتے کانود نا رداٹ ایسر اسکان سرکننگ کن بھاز سنجیدہ کوشست کننگ ءِ۔
