اسلام آباد۔ 24 مئی (اے پی پی) وزیراعظم عمران خان پارینے کہ ریاست مدینہ آنبار ہراکہ قوم راج انا نزور تپہ نا زمواری ءِ ہلک و کانود نا بالادستی نا اصول ءِ تینا کرے او قوم شون ہلک، چین 35 سال اٹی 70کروڑ مخلوق ءِ نیزگاری آن کشا، نن ہموماڈل آ عمل کننگ اُن، احساس پروگرام ہنداچرجوئی نا کڑی اسے، ورلڈ بینک انا رداٹ کورونا دین آن زہمی تپہ ءِ دمدستی و شفاف وڑاٹ کمک تروک آ ملک آتے ٹی پاکستان چارمیکو نمبرآٹی ءِ۔ اودوشنبے نادے آ داڑے احساس بچت بینک اکاؤنٹ پروگرام نا بناء آ اڈ ہلوک آ دود آن تران کریکہ۔ داوخت آ ڈاکٹر ثانیہ نشتر ہم تران کرے۔ وزیراعظم عمران خان تران کرسا پارے کہ او ورلڈ بینک انا کنڈآن احساس پروگرام ءِ سیفٹی نیٹ انا کوووڈ اٹی دنیا نا چارمیکو گچین پروگرام گوندنگ نا شرف نا دوئی کننگ آ ڈاکٹر ثانیہ نشتر، احساس نا ٹیم ءِ خراج تحسین پیش کیک۔ اوپارے کہ دنیا ٹی کورونا نا دین اٹی ہزگار و نیزگار غٹ ملک آتے ٹی لاک ڈاؤن آن غٹ آن زیات غریب زہمی مس، دنیا ٹی داوخت آ کروڑ آ مخلوق نیزگاری نا شیفکو کہول آ بس، غٹ آن زیات نزور و دیہاڑی دار تپہ زہمی مس۔ اوپارے کہ ہراملک آک دمدستی و شفافیت اٹ زہمی تپہ نا کمک ءِ کریر اوفتے ٹی ورلڈ بینک انا رداٹ چارمیکو نمبر آ پاکستان ءِ، اگہ دمدستی وڑاٹ دا پروگرام ءِ تفروسن تو 25درسد نیزگاری نا گواچی ملک پاکستان اٹی نیزگار مخلوق ءِ پین مشکل مون تروئی تماکہ۔ داپروگرام اٹی سیاسی بنداو آ کس اسے فائدہ تننگتو، داپروگرام اٹی ٹیکنالوجی ءِ کاریم اٹ اتنگاحقدار آتا کمک ءِ کننگا۔ اوپارے کہ احساس اکاؤنٹ نا اِراسوب آن اہمیت ءِ داٹی اسٹ بینکنگ سسٹم اٹ زیات آن زیات رجسٹریشن ءِ داڑآن نیزگاری ٹی کمتی بریک و ارٹ میکو داڑآن زالبول آتے روزگار نا وارخواہی دوبریک، زیات آن زیات مخلوق مالایات نظم اٹ بننگ آن نیزگاری ٹی ترندی اٹ کمتی بریک۔نائیجریا، کینیا و بنگلہ دیش اٹی دانا آزموندہ ءِ سرسہبی اٹ کننگانے۔ زالبول آتے مین اسٹریم اٹ اتنگ آن اوفتا زند اٹ گچینی بریک، اوتینا کاروبار نا بناءِ کننگ کیرہ۔ داپروگرام ہم احساس نا رداٹ چلینگوک آ پروگرام تیانبار سرسہب مریک۔ اوپارے کہ اسہ ملک اس ہم ہمووخت اسکان عظیم مننگ کپک ہراتم اسکان پدسلوک آ تپہ ءِ گوجالسا کرسا کننگا و اوفتے شون تننگتو، اسہ ملک اس ہم ہراڑے ہزگار آتا اسہ چنکو جزیرہ اس و غریب آتا مچ آ سمندر مرے او شون ہلنگ کپک۔ ریاست مدینہ ٹی اولیکو وار نزور تپہ نا زمواری ءِ ہلنگا، آسودہی ریاست نا تصور تسر، ہنداسوب ئس داخہ ترندی اٹ اسہ قوم اس ہم شون ہلتو اخس کہ ترندی اٹ ریاست مدینہ شون ہلک و کیہی صدی تسکان دنیا غا حکومت کرے، ہموڑے احساس ئس، غریب، چوری، جنوزان تے تینا کریسس، اوننکن درور اسے، داماڈل آ اگہ قوم اس چلینگے او شون ہلیک۔ وزیراعظم پارے کہ کانود نا بالادستی ارٹ میکو اصول ئس ہرانا بنداو آ قومک شون ہلکر، چین 35 سال اٹی 70 کروڑ بندغ آتے غریبی آن کشا، چین ہراوڑمون آ ہِننگ ءِ لگک او دنیا ءِ پدی ہلک۔ اوپارے کہ ننا ہم ہموماڈل ءِ نن نزور تپہ ءِ بڑزاہرفنگ کن مچ آ زور ءِ خلنگ اُن، احساس پروگرام ہم ہنداخاطرآن ءِ کہ زالبول آتے قومی دنگ اٹ اتنگے۔
