اسلام آباد۔ 24 مئی (اے پی پی) وزیراعظم نا خصوصی کمکار تخفیف غربت سینیٹر ڈاکٹر ثانیہ نشتر پارینے کہ احساس پروگرام نا رداٹ چناتے تعلیمی وظیفہ پرائمری آن داسہ یکم جولائی آن سیکنڈری اسکان تننگ بناکیک۔ احساس کفالت پروگرام اٹ ودکی کن سمری اس مون تسونن۔ اودوشنبے نادے آ داڑے احساس بچت بینک اکاؤنٹ نا اسلام آباد آن بناءِ کننگ نا وخت آ اڈ ہلوک آ دود آن تران کریکہ۔ داوخت آ وزیراعظم عمران خان ہم ساڑی ئس۔ اوپارے کہ احساس پروگرام نا ہفت ہدف و 270گام گیج ءُ، احساس ٹیم تندہی اٹ دانا پوروی کن کوشست کننگ ءِ، پروگرام ءِ گچین و شفاف کننگ کن گام گیج کننگانے، دیانتداری ءِ پک کننگ کن 32 ٹک شین تسونن، دانا چاروکی کن 32 ڈیش بورڈ ءُ ہرافتا ماہانہ جاچ دیوان اٹی جاچ ءِ ہلنگک۔ اوپارے کہ شفافیت و وڈی خوری ءِ توننگ ننا مشن ءِ۔ احساس کفالت پروگرام کن سروے 88 درسد پورو مسنے، ون ونڈو ناوزیراعظم اِراہفتہ اسکان بناءِ کیک، احساس کفالت پروگرام آن داوخت آ70 لکھ خاہوت فائدہ ہرفنگ ءُ، دادے ودفنگ کن سمری اس مون تسونن، چناتے داوخت آ داپروگرام نا رداٹ پرائمری اسکان تعلیمی وظیفہ تننگ انگ ءِ دادے یکم جولائی آن سیکنڈری اسکان ودفنہ۔ اوپارے کہ سروے نا پوروی آن پد تحصیل نا کہول آ ڈیسک اس جوڑ کننگک ہراڑے رہینگوک آ حقدار آک تینا اندراج ءِ کرفنگ کیرہ۔
