اسلام آباد۔ 24 مئی (اے پی پی) وزیراعظم نا خصوصی کمکار امور نوجوانان عثمان ڈار پارینے کہ ورناتے فیصلہ سازی و سیاسی اختیار آتسکان رسینگ مریک، ہراڑآن او پاکستان ءِ مون آ دننگ کیرہ، سرسہب ورناپروگرام نا ننا بنداوی مشن روزگار نا فراوانی ءِ۔ دوشنبے نادے آ ایئر یونیورسٹی ٹی اڈ ہلوک آ دود آن تران کرسا اوپارے کہ حکومت ورناتے کن روزگار نا گچین وارخواہی فراوان کننگ کن کوشست کننگ اٹی ءِ، خوانوک آ ورناتا اولیت روزگار دوئی کننگ مریک، حکومت ورناتے فیصلہ سازی ٹی اوار کننگ خواہک، ملک انا 68 درسد آبادی ورناتیا تالان ءِ، ہراملک انا غٹ آن بھلا میرات ءُ واوفتا رضاکارانہ خذمت آک ہم بھاز اہم ءُ، تعلیم، روزگار و چندی بشخ آتے کن اوفتا خذمت آتا جاچ ءِ ہلنگ انگ ءِ۔ اوپارے کہ ورناتا ملک انا سیاسی اختیار آتسکان رسینگ مریک و ہنداوڑ اوفتے فیصلہ سازی نا عمل اٹ اوار کننگ نا خواست پورو مریک۔۔ اوپارے کہ تعلیم، روزگار و شاری خذمت آتا مجموعہ نا پن سرسہب ورناپروگرام ءِ۔ اوپارے کہ حکومت ءِ دا چرجوئی ٹی انت کہ گام گیج اس کروئی ءِ، اوفتے ٹی دا جاچ ءِ ہلوئی ءِ کہ اخس بھلو کچ اسے ٹی روزگار نا فراوانی مننگ کیک۔ سرسہب ورناپروگرام وزیراعظم عمران خان نا وژن نا رداٹ ءِ۔ اوپارے کہ یونیورسٹی آ بننگ نا مسخت داپیدوار کننگ ءِ کہ بڑزکوتعلیم یافتہ ورناک پاکستان ءِ مون آ دننگ کیرہ و ایلوفتے کن ہم روزگار ودی کننگ کیرہ، سرسہب ورناپروگرام نا ننا بنداوی مشن روزگار نا فراوانی ءِ۔ اوپارے کہ پاکستان نا ورناتا مائنڈ سیٹ ءِ کلیئر کننگ بھاز المی ءِ، حکومت روزگار ودی کننگ کیک ولے داخہ در بھلو کچ اسے ٹی سرکاری نوکری تننگ مفک۔ اوپارے کہ ہرسال کم و ود 20 لکھ ورنا ڈگری ہلنگ آن پد مارکیٹ آتیا بننگ ءُ۔ حکومت اوفتے داخہ بھلو کچ اسے ٹی سرکاری محکمہ غاتے ٹی اوفتے روزگار تننگ کپک ولے حکومت ورناتے کن اسہ کمکار نا کڑد اس ادا کننگ کیک، حکومت نا کاریم ہندن ءُ حالیت و وارخواہی ودی کننگ ءِ ہراڑآن روزگار ودی کننگ مرے، زرگزران ءِ سوگو کرسا روزگار ودی کننگ مریک، ای داخاطرآن یونیورسٹی نا دورہ ءِ کننگ اٹی اُٹ کہ ہمو غٹ ورناک ہراڈگری ہلیرہ اوفتا ہراوڑ کمک مننگ کے۔
