گھوٹکی۔ 24 مئی (اے پی پی) بنجائی وزیر ڈٹ بندی، شونداری، اصلاحات، خصوصی گام گیج و این سی او سی نا سروک اسد عمر پارینے کہ گھوٹکی غٹ آن زیات گیس انا پیدوار تروک آ ضلع ءِ، داجاگہ نا گیس پاکستان نا گیشتر شارتے فراوان کننگ انگ ءِ اوکان پد ہم مستین اٹ گھوٹکی نا ہندی آبادی ءِ گیس تننگتو ہراظلم اس ئس، وزیراعظم عمران خان وسیلہ والا علاقہ غاتا مخلوق ءِ آسراتی نا ترجیحاََ فراوانی آ یخین تخک، اوگیس فیلڈز انا کیبی علاقہ غاتے ٹی گیس انا فراوانی ءِ پک کرے۔ داخیال آتا درشانی ءِ اسد عمر گھوٹکی ٹی میڈیا تون گپ وتران کرسا کرے۔ اوپارے کہ سندھ اٹی پنجا سال آن پیپلزپارٹی نا حکومت مننگ آن پد ہم شونداری کاریم متو، بلاول بھٹو نا پارٹی سندھ اٹی ہمووخت آن حکومت کننگ ءِ ہراتم او ودی ہم متویسس۔ او امر ءُ وخت اس خواہنگ ءِ، سندھ حکومت نا پالیسی ءِ کہ کاریم کینہ نئے کننگ کن الینہ، حلیم عادل شیخ آ جلہو کرفنگ اٹ سندھ حکومت آن کس اس اوار ءِ۔ اوپارے کہ وزیراعظم سکھر آ بننگ آ 14ضلع غاتے ٹی شونداری کاریم تا جال اس تالان کننگ نا پڑو ءِ کرے، سی دے انا تہہ ٹی گھوٹکی، جیکب آباد، خیرپور، سکھر اٹی شونداری اسکیم تا بناءِ کننگ اٹی اُٹ۔ اسد عمر پارے کہ سندھ حکومت کاریم کننگ آن توننگ نا کوشست کننگ اٹی ءِ۔ اوپارے کہ وزیراعظم نا بیست ءُ دو سال انا جہد اسہ بندغ اسے کن الوکہ، ننا پارٹی نا پن انصاف ءِ و انصاف آ یخین تخنہ، زوراور مخلوق کن اسہ وڑ کانود ءِ، اوپارے کہ وزیراعظم کس اسے آن بیر ہلنگ خواپک ونئے کس اسے رعایت ایتک، ترین گروپ نا خواست آک سادہ ءُ اوفتیا ہیت مسنے۔
