کوئٹہ۔ 24 مئی (اے پی پی) وزیراعلیٰ بلوچستان جام کمال خان پارینے کہ حکومت گوازی تا مون آ دننگ و لائخ آ ورناتا سرپرستی ءِ پک کننگ ءِ، بلوچستان اٹی لائخ آ گوازی گرآتا کمتی اف، گوازی گر آتا است بڈی ءِ کرسا اوفتے تربیت ناوارخواہی فراوان کننگ اُن، صوبائی حکومت کلچر نا مون آ دننگ کن گچین گام گیج کننگ اٹی ءِ، پاکستان و بلوچستان نا پن ءِ روشن کروک آ ورناتے ہرلحاظ اٹ سپورٹ کینہ۔ داخیال آتا درشانی ءِ او دوشنبے نادے آ مستونگ آن تعلق تخوک آ جہانی شہرت یافتہ پاور بلڈرز غلام فاروق باروزئی، عزیر فاروق باروزئی و معذور رکشہ ڈیور نادرشاہ تون اوڑدہی ٹی گپ وتران کرسا کرے۔ داوخت آ اوڑدہی ٹی صوبائی وزیر میر اسداللہ بلوچ، انجینئر زمرک خان اچکزئی، حاجی محمد خان طوراتمانخیل، صوبائی سلاہکار عبدالخالق ہزارہ، پارلیمانی سیکرٹری گودی بشریٰ رندو ترجمان حکومت بلوچستان لیاقت شاہوانی ئسک ہم ساڑی ئسر۔ وزیراعلیٰ بلوچستان جام کمال خان پارے کہ صوبہ نا ہندی ٹیلنٹ ہنٹ انا بابت گام گیج کننگ اُن، داوخت آ وزیراعلیٰ بلوچستان ینگ پاور بلڈرعزیر فاروق باروزئی ءِ گوازی تون اوار اوار تعلیم برجاتخنگ نا پارت کرے۔ اوینگ پاور بلڈرعزیر فاروق باروزئی نا داخلہ ملٹری کالج سوئی ٹی کرفنگ نا پارت کرے، وزیراعلیٰ معذور بندغ آتے باعزت روزگار اس بناکننگ کن رکشہ نا فراوانی نا پروگرام اس اتنگ نا ہم پارت کرے۔ معذور رکشہ ڈیور نادرشاہ نا کنڈآن کوئٹہ شار اٹی خصوصی بندغ آتے مفت رکشہ سرس نا فراوانی نا گام گیج انا ستاءِ کرے، وزیراعلیٰ پاور بلڈرز غلام فاروق باروزئی، عزیر فاروق باروزئی و معذور رکشہ ڈیور نادر شاہ ءِ نغد انعام ہم تس۔
