اسلام آباد۔23مئی (اے پی پی):وزیر تہی کار شیخ رشید احمد ءَ گوشت کہ پاکستانی معیشت ٹیک آف کتگ، دیمروئی ءِ کساس آیوکیں دو سال آنی تہ ءَ گیش ود ایت، اپوزیشن ءِ سیاسی دکان بند بوتگ، ایشاناں ترس انت کہ عمران خان آیوکیں دو سلا ءَ گیش کامیاتی در جنت، یک شمبے ءِ روچ ءَ وتی بیان ءَ آئی ءَ گوشت کہ کورونا وائرس ءِ ھوپ ءُ نہ وشیں میاں اوستمانی معاشی جاور آں ابید پاکستانی معیشت ءِ 4 درسد گروتھ ریٹ مزن وزیر عمران خان ءُ آئی معاشی ٹیمب ءِ جوانی ءِ درور انت۔ توامیں معاشی ٹک پازیتیو بوھگ ءِ مول ءُ مراد ھمیشن انت کہ پاکستانی معیشت نوں “ٹیک آف ” کتگ۔ آیوکیں دو سال آنی تہ ءَ دیمروئی ءِ کساس انشاء اللہ گیش ود ایت۔ وزیر ءِ تہی کار ءَ گوشت کہ اپوزیشن ءِ معاشی دیمروئی ءِ سر ءَ ایراد ءِ مول ءُ مراد ملک ءِ ایوک ءَ سیاسی کشاں چیل پیداک کنگ انت، اپوزیشن ءَ را ترس انت کہ عمران خان آیوکیں الیکشن ءَ گیش کامیاتی در جنت۔ آوانی سیاسی دُکان نوں بند بوتگ انت۔ آئی ءَ گوشت کہ آیوکیں بجٹ ءَ گریب ھاسیں رنگ ءَ پگار گروک ءُ اسپیت پوشیں تبک ءِ واستہ آسراتی ایر کنگ بیت۔
