وزیراعظم عمران خان کراچی نیوکلیئر پاور پلانٹ نا 1100میگاواٹ نا یونٹ۔ 2 نا بناءِ کرے

اسلام آباد۔ 21 مئی (اے پی پی) وزیراعظم عمران خان کراچی نیوکلیئر پاور پلانٹ یونٹ۔ 2 (K-2)  انا بناءِ کرے۔ جمعہ نادے آ کراچی و بیجنگ اٹی پاور پلانٹ نا بناءِ کننگ نا دود ورچوئل اڈتننگا ہرافتے ٹی وزیراعظم عمران خان اسلام آباد آن بشخ ہلک۔ دودا ٹی بنجائی وزیر حوالکاری و شینکاری فواد چوہدری،بنجائی وزیر سائنس و ٹیکنالوجی شبلی فراز، بنجائی وزیر توانائی عمرایوب خان، بنجائی وزیر حماد اظہر، چیئرمین اٹامک انرجی کمیشن محمد نعیم و ایلوفک ہم بشخ ہلکر۔ چیئرمین اٹامک انرجی کمیشن وزیراعظم عمران خان نا دود اٹی بشخ ہلنگ آ منت واری ءِ ہرفے۔ ڈائریکٹر جنرل انٹرنیشنل اٹامک انرجی ایجنسی رافیل گروزی ہم دود آن ورچوئل تران کرے و پاکستان نا پرامن مسخت آتے کن ایٹمی توانائی نا کاریم اٹ اتنگ نا ستاءِ کرے و اودے رکھ و چاگڑد دوست گوندا۔ چیئرمین چائنا اٹامک انرجی اتھارٹی پاک چین سفارتی تعلقداری نا سال دے انا مبارکبادی ترسا داڈٹ ءِ پاک چین سنگتی نا درشانی گوندا و پارے کہ چین پاکستان تون کمکاری ءِ برجاتخک۔ ڈی جی ایس پی ڈی و تعلقدار کمامدارآک ہم داوخت آ ساڑی ئسر۔ K-2نیوکلیئر پاور پلانٹ پوسکن انگا وڑانا جنریشن تھری نا نیوکلیئر پاور پلانٹ ءِ ہراکہ رکھ و سیفٹی نا پوسکن انگا بست وبند آتیان شپ ءِ۔ داٹی داخلی و خارجی رکھ و شکست آتیان بچنگ آن بیدس ایمرجنسی نا دروشم اٹ بچنگ و تدارک نا پوسکن انگا لائخیک اوار ءُ۔ داپلانٹ نا آپریشنل مد 60سال ءِ ہرادے پین 20 سال اسکان ودفنگ مریک۔ داپلانٹ نا دوئی مننگ و استعداد نا عوامل آک پین جوان ءُ و ایندھن نا کاریم اٹ اتنگ نا مد ہم زیات ءِ۔ داپلانٹ نا تفنگ نا بنا2013آن بناکرے و پاکستان نیوکلیئر ریگولیٹری اتھارٹی (پی این آر اے) آن رسمی منظوری آن پد داٹی ایٹمی ایندھن نا تنصیب نا کاریمیکم دسمبر 2020ء آن کننگا۔ تکنیکی جانچ پڑتال ہراٹی چندی ٹیسٹ اوار ئس، فروری نا ایسر اٹ و داپلانٹ نا طبعیاتی ٹیسٹ آتیان پد 18 مارچ 2021ء آ دادے نیشنل گریڈ تون منسلک کننگا تانکہ داڑآن بجلی نا پیدوار ءِ پدریسہ ودفنگ مرے۔ پاکستان ایٹمی توانائی کمیشن نا زیر انتظام 6 نیو کلیئر پاور پلانٹ کاریم کننگ ءُ 2 نیوکلیئر پاور پلانٹ کراچی نا ساحل انا ماس آ کراچی نیوکلیئر پاور پلانٹ K-1و کراچینیو کلیئر پاور پلانٹ K-2 نا پن اٹ ءُ و چار نیو کلیئر پاور پلانٹ چشمہ نیو کلیئر پاور پلانٹ 1 آن 4 اسکان چشمہ نا ہند آ کاریم کننگ ءُ، داتم اسکان پاکستان اٹی ایٹمی ذریعہ اٹ بجلینا پیدوار کم و ود 1400 میگاواٹ اسکان ءِ، K-2 نا بنا آن پد پین 1100 میگاواٹ ودکی آن دا اِرا ہنداخہ پین نا خڑک سرمریک۔ ہنداخہ ہی پیدواری لائخی نا نیوکلیئر پاور پلانٹ K-3۔ داسہ تنصیب نا آخیریکو ریسہ غاتیان گدرینگ انگ ءِ کمیشننگ نا عمل آن گدرینگ انگ آن پد داڑآن بجلی نا پیدوار بروک آ سال انا بناٹی گمانی ءِ۔