وزیراعظم عمران خان نا پلانٹ نا بنائی دود آن تران

اسلام آباد۔ 21 مئی (اے پی پی) وزیراعظم عمران خان پارینے کہ پاکستان کرپشن نا چٹفنگ و کروڑ آ مخلوق ءِ نیزگاری آن کشنگ تون اوار چین آن بھاز گڑا ہیل کننگ کیک، چین اتون کمکاری ءِ ودفنہ، سی پیک نا رداٹ صنعتی و کشاری بشخ اٹی ہم کمکاری ءِ مون آ دننگک، پاک چین سنگتی نا ماسک الس اٹ پین گہری مننگ ءُ، الس چاہک چین ہندن ءُ سنگت اسے ہرا ہر مشکل اٹ سلک۔ داخیال آتا درشانی ءِ او جمعہ نادے آ کراچی نیوکلیئر پاور پلانٹ ٹو انا بنائی دود آن ترا ن کرسا کرے۔ وزیراعظم عمران خان پارے کہ 11 سد میگاواٹ نا دا ڈٹ خوش آئند و دالحاظ اٹ ہم بھاز اہمیت تخک کہ داڑآن کلین انرجی ودی مریک، داپاکستان کون آ ملک اکن بھاز اہم ءِ انتئے کہ نن گلوبل وارمنگ آن زہمی اُن وخت اس کہ ننا سیبو گلیشئرآٹی ءِ ہراننادریاتے 80 درسد دیر ایتک اگہ نن گلیشئر آتے ہنداوڑ دیر مننگ آن توننگ کن گام گیج کتون تو ننا بروک آ چین تے دیر و خور انا ویل مون تروک مریک۔ وزیراعظم پارے کہ نن مستین اٹ دیر آن توانائی نا دوئی کننگ آ داخس چکار کتون اخس کہ پوٹیشنل ساڑی ءِ۔ چین نا کمک اٹ توانائی نا ڈٹ آتا سوب پاکستان نا افرادی قوت کسبکار مننگ ءِ و ٹیکنالوجی نا منتقلی ہم مننگ ءِ، پاور پلانٹ آتا ڈٹ آتیا 40 ہزار چینی کارندہ کاریم کریر، داڑآن ننے تینا مخلوق ءِ ہیل تننگ اٹ ہم بھاز کمک رسینگک۔ وزیراعظم پارے کہ چین اتون نننا بھاز یکتا تعلق ءِ۔ اینو وخت اس کہ نن تینا سفارتی تعلقداری نا 70 می سال دے ءِ اڈتننگ اُن تو دا تعلقداری داسہ الس نا کہول اسکان استوار مننگ ءِ، پین ودنگ ءِ، نن دینی لحاظ اٹ اسہ کنڈآ مسلمان ملک آتا خڑک اُن تو ایلو کنڈآ چین ننا ہندن ءُ ہمسایہ اسے ہرانا بارواٹ ننا الس اٹ دا سوچ پکا مسنے کہ چین ہر مشکل اٹ ننتون سلک۔ چین اتون پاکستان نا الس نا اسہ جذباتی تعلقداری اس ودی مسنے۔ اوپارے کہ پاکستان نا چین اتون تعلقداری پین مون آ کاہک و ننا خوش بختی ءِ کہ ننا ہمسایہ دنیا ٹی شونداری نا رمب اٹ بھاز مون آ ہنانے و پین مون آ ہِننگ ءِ۔ وزیراعظم پارے کہ پاکستان چین آن بھاز گڑا ہیل کننگ کیک، چین تینا شاری تے ہراوڑ سنبھالا اوڑآن نن بھاز گڑاہیل کننگ کینہ، ننا شارہم بھاز تالان مسنے، نن داچرجوئی ٹی دیکی نا جاگہ غا چین آن زیات ہیل کننگ کینہ۔