وزیراعظم عمران خان نا ایشیانا آخبت نا سرحال آ 26 می کانفرنس آن ورچوئل تران

اسلام آباد۔ 21 مئی (اے پی پی) وزیراعظم عمران خان پارینے کہ ایشیانا آخبت دنیا نا آخبت ءِ، ننے چیلنج آتا مون تروک ءِ ولے شونداری و شونہالی نا جوان ءُ وارخواہی اس ساڑی ارے، کورونا غان زہمی پدتموک ملک آتا زرگزران تا بحالی و راجی سوگوی کن مالیاتی آسانی و فنڈ فراوان کننگے، شون ہلوک و پدتموک زرگزران تا نیام اٹ ڈیجیٹل پرخ ءِ چٹفوئی مریک، پائیدار شونداری و 2050اسکان کاربن نا پورو اخراج نا ہدف آتا دوئی کننگ کن بنداوی پنجر آ بھلو کچ اسے آ زرکاری نا گرج ءِ، پاکستان بھارت تون اوار غٹ ہمسایہ ملک آتون پرامن و کمکاری آ مبنی تعلقداری تا خواہندار ءِ داڑکن بھارت ءِ کشمیر اٹ انسانی حق انا لتاڑتے بند و 5 اگست نا اسہ کنڈی گام گیج آتیا نظرثانی کروئی مریک، فلسطین نا حالیت آک ہراسٹ کن گڑتی نا سوب ءُ۔ اقوام متحدہ نا تعلقدار قرارداد و دوریاستی نظریہ نا رداٹ ساف و دیرپا ایسری کن آسراتی بایدے فراوان کننگے، ہراتم اسکان دا ڈیہہ ٹی دیرینہ و ایلو جھیڑہ غاتے ایسر کننگپک شونداری نا گمان تیان ہمووخت اسکان فائدہ ہرفنگ مفک، اوغانستان نا جھیڑہ نا ہچ ءُ فوجی ایسر اس اف۔ او جمعہ نادے آ ایشیانا آخبت نا سرحال آ 26 می کانفرنس آن ورچوئل تران کریکہ۔ اوپارے کہ داکانفرنس آن تران اوڑکن شرفمندی اسے، ایشیادنیا نا آبادی نا نیمہ ءِ ایشیانا آخبت دنیا نا آخبت ءِ، داہمو جاگہ ءِ ہراڑے تدوک آ 50 سال اٹی بھاز فعال زرگزرانی نمو، ٹیکنالوجی ٹی شونداری، راجی بدلیم، صنعت وحرفت اٹ شونداری و انسانی شونداری مسنے۔ اوپارے کہ اینو ایشیا و دنیا اہم موڑآٹو، ننے بھلا چیلنج مون تروک ءِ، ولے ننتون شونداری، شونہالی کن مون آ ہِننگ نا جوان ءُ وارخواہی اس ہم ساڑی ارے۔ اوپارے کہ داوخت آ ننا اولیکو اولیت کوویڈ۔ 19 نا مقابلہ و اودے توننگ ءِ، دادین تدوک آ سد سالہ جان جوڑی، زرگزران و راجی بابت بدترین ءُ تنکی اس ودی کرینے۔ دادین کروڑآ بندغ آتے زہمی کرے، 30 لکھ آن زیات بندغ داڑآن زوال کریر، زرگزرانی نمو ٹی تنزلی مس، نیزگاری ٹی ودکی مس،وبدترین ہیت دادے کہ بے روزگاری ٹی بے پناہ ودکی مسنے، دادین آ ہراتم اسکان پورو کنٹرول مفک داراجی انتشار و ایشیا و دنیا ٹی ہرجاگہ غا امن و سلامتی کن خطرہ مننگ کیک۔ اوپارے کہ بدبختی اٹ داڑآن اسٹ اس ہم ہمووخت اسکان رکھ مفک ہراتم اسکان ہراسٹ رکھ مف۔ ننے داہیت ءِ پک کننگ کن المی وڑاٹ اواری اٹ کاریم کروئی مریک۔ کوویڈ ویکسین ہراسٹ ءِ زوت آن زوت ہرجاگہ غا دوئی مرے، ویکسین نا فراوانی و بشخنگ ءِ دمدستی وڑاٹ ودفنگے، حق دانش معاف کننگے، پدتموک دنیا تون اوار دانا پیدوار ءِ ودفنگے و ویکسین نا آسراتی ءِ ودفنگے و مالی آسراتی فراوان کننگے۔ اوپارے کہ دادین غریب ملک آتے زیات زہمی کرینے دانا زہم تتون مقابلہ کن المی ءِ کہ کم کٹیا کروک ملک آک و ایلو مالی فریشانی تا گواچی ملک آتے نمو بحالی و راجی سوگوی ءِ برقرار تخنگ کن مالیاتی آسانی و فنڈز فراوان کننگے۔ اوپارے کہ ای وام تے ٹی آسراتی کن پنچ ٹکی ایجنڈاءِ تجویز کریٹ، ایس ٹی آر نا ٹہیفنگ و وام تا اول سرآن مرتب کننگ، گیشتر آسان مالی فنانس،م ماحولیاتی بدلینا بابت، مالیاتی قول آتا پوروی و پدتموک ملک آتیان زرانا غیر کانودی گدریفنگ نا چٹفنگ کن تجویز کریٹ۔ کنے خوشی ءِ دا المی گام گیج آتا بارواٹ امنائی سلاہ ودی مننگ ءِ۔ اوپارے کہ او جی 20 ملک آتا کنڈآن وام معطلی نا گام انا ستاءِ کیک، 650 ایس ڈی آرتا جوڑ کننگ نا پوسکن آ معاہدہ، آئی ڈی اے فنڈنگ اٹ توسیع و کثیر الجہت شونداری بینک آتا ہلہلہ ئی کمکی پروگرام تے ٹی ودکی، زرآتا ناروا گدریفنگ نا بابت ایف اے سی ٹی آئی نا سلاہ و سوج آتیا ہم عملدرآمد مرے۔ ننے مرے کہ ایشیاٹی و ایلو جاگہ غاتیا ترندی اٹ بحالی ءِ پک کننگ کن زرگزران تے ملوک تخن، بند سپلائی چین تے ملن و رکھ انا پالیسی تا لالچ نا برخلاف مزاحمت کین۔ اوپارے کہ اگہ ایشیاو ایلو زرگزرانک سال 2030اسکان پائیدار شونداری نا ہدف و 2050اسکان کاربن نا پورو اخراج نا ہدف آتے دوئی کروئی ءِ تو ننے پوسکن و پائیدار بنداوی پنجریعنی توانائی، نقل و حمل، ہنکین، کشت وکشار و صنعت اٹی بھلو کچ اسے آ زرکاری نا گرج مریک۔ اوپارے کہ دامسخت نا دوئی کننگ کن سرکاری و نجی ہڑتوم آبشخ آتے متحرک کروئی مریک۔ کم شون ہلوک ملک آتا پائیدار بنداوی پنجر نا ڈٹ آتا اولیت آتے طے کننگ اٹ کمک کننگے۔ اوپارے کہ نجی زرکاری ءِ متوجہ کننگ کن داوڑنا ڈٹ آتے جتا ذریعہ اٹ دوئی مروک آ فنڈ و زرکاری نا ضمانت و معاعات آتا کمک اٹ خطرہ غاتیان آجو کننگ نا گرج ءِ۔ اوپارے کہ نن پائیدار شونداری و ماحولیاتی ہدف آتے مون آ دننگ کن درکار ہدف آتیا مبنی جدت واستعمال کار آ پٹ وپول نا کمک اٹ پائیدار نمو ٹی ودکی کن ہرحال اٹ سائنس و ٹیکنالوجی ءِ متحرک کننگ نا عمل ءِ برجاتخن۔ متحرک نمو ءِ پک کننگ کن زرگزران تا ترندی اٹ ڈیجیٹلائزیشن المی ءِ۔ اوپارے کہ شون ہلوک زرگزران ہراڑے 87 درسد مخلوق آن لائن ءُ و نیزگار ملک آک ہراڑے بیرہ 19 درسد آبادی ءِ انٹرنیٹ اسکان رسینگ دوئی ءِ، نا نیام اٹ ڈیجیٹل تقسیم ءِ چٹفوئی مریک، ایلو دروشم اٹ شون ہلوک و پدتموک زرگزران تا شونداری نا کسر آ پرخ پین ودک، دامسخت کن ڈیجیٹل ہارڈویئر و سافٹ ویئر اٹ زرکاری ٹی ودکی نا گرج ءِ۔ خاص وڑاٹ ایشیاٹی سوگو و متحرک زرگزرانی نمو نا زیات سیبو تین پہ تینی ملاپ و طبعی رابطہ غاتیاٹی ءِ۔ اوپارے کہ چین نا روڈ اینڈ بیلٹ گام ایشیابحراوقیانوس نا ڈیہہ و اوڑآن پد علاقائی رابطہ غاتے کن اہم کسراس فراوان کیک۔ اوپارے کہ نن ایشیاو ایلو جاگہ غاتیا آب اٹ بنداوی پنجر نا مخ تف و مالی امداد کن جاپان و ایلو ملک آتا سلاہ تا خیرمقدم ءِ کینہ۔ چین پاکستان اقتصادی راہداری بیلٹ اینڈ روڈ گام انا فلیگ شپ ڈٹ ءِ داڈٹ آن زرگزرانی سرجزآتے ٹی و روزگار نا وارخواہی ودی مسنے وداڑآن علاقائی و ہڑتوم آ کنڈآتا واپار اٹی ودکی مریک۔ پاکستان غٹ سنگت ملک آتے سی پیک نا چھترینا رداٹ جوڑ مروک آ چندی صنعتی و زرگزرانی زون تے ٹی زرکاری نا سلہ خلکونے۔ پاکستان وسط، سویلی و دیکی ایشیاو اوڑآن مون انا زرگزران تیکن اسہ جغرافیائی مرکز نا وڑاٹ خذمت سرتننگ نا چاری ءِ، داذیلی ڈیہہ ہمو علاقہ ءِ ہراڑے ایشیاٹی پوسکن متحرک شونداری نا زیات گمان ارے۔ اوپارے کہ نن داگمان تیان ہمووخت اسکان فائدہ ہرفنگ کپنہ ہراتم اسکان دا ڈیہہ ٹی متکن و ایلو جھیڑہ غاتے ایسر کپن۔اوپارے کہ پاکستان اوغانستان اٹی امن عمل نا پبی مخ تفی ءِ کرینے، اوغانستان آن درملکی فوج ہندن کہ پیش تمک المی ءِ کہ اوغان کڑدہ غاتا نیام اٹ امن عمل ءِ مون آ دننگ نا کوشست آتے اِراہنداخہ کننگے۔