اسپیکر قومی اسمبلی نا کماشی ٹی پارلیمنٹ نا باسک آتا فلسطینی تتون یکجہتی نا درشانی ءِ کننگ کن شاہراہ دستور آ واک

اسلام آباد۔ 21مئی (اے پی پی) اسپیکر قومی اسمبلی اسد قیصر نا کماشی ٹی پارلیمنٹ نا باسک آک جمعہ نادے آ فلسطینی تتون یکجہتی نا درشانی ءِ کننگ کن شاہراہ دستور آ واک کریر۔ داوخت آ سینیٹ اٹی قائد ایوان ڈاکٹر شہزاد وسیم تون اوار بھلو کچ اسے ٹی قومی اسمبلی نا باسک آک و سینیٹ نا باسک آک بشخ ہلکر، اوکان پد ڈپٹی اسپیکر قومی اسمبلی قاسم خان سوری پارلیمنٹ نا باسک آتون اوار اقوام متحدہ نا دفتر آ ہنسا قومی اسمبلی آن 17 مئی آ منظور مروک آ امنائی قرارداد نا نقل اس اقوام متحدہ نا نمائندہ نا دوٹی تس۔ پارلیمنٹ نا باسک آک پاکستان، فلسطین و کشمیر نا بیرک ءِ ہرفیسر۔ اسپیکر قومی اسمبلی اسد قیصر واک انا کماشی ءِ کرے۔ داوخت آ اسپیکر قومی اسمبلی اسد قیصر تران کرسا پارے کہ فلسطین نا ویل انا ایسری پارلیمنٹ و مچ آ قوم انا توار مسنے و مچ آ پارلیمنٹ دا معاملہ غا حکومت تون تفوک ءِ۔ پارلیمنٹ کشمیر نا ویل انا بابت وزیر خارجہ شاہ محمود قریشی نا دورہ امریکہ غان مست امنائی قرارداد اس منظور کرے۔ اوپارے کہ داوخت آ مچ آ امہ و اوآئی سی ءِ یکجا مروئی مریک و فلسطین و کشمیر کن داسہ ننے بش مروئی مریک۔ اوپارے کہ داوخت آ مچ آ قوم ءِ یکجہتی نا گرج ءِ۔ اوپارے کہ جنگ بندی نا پڑو ستاکڑزک، ولے اسرائیل ہراجنگی ڈوہ کننگ ءِ، دنیا ءِ اوڑآ سنجیدہ فیصلہ کروئی مریک۔ اوپارے کہ اقوام متحدہ نا انسانی حق کونسل نا دیوان ءِ پنچ شنبے آ بٹنگ انگانے۔ پاکستان نا کنڈآن دیوان ءِ بٹنگ انگ نا خواست کننگاسس۔ اسپیکر پارے کہ غزہ ٹی اسرائیلی جلہو آتیان 235فلسطینی شہید مسر ہرافتے ٹی چناک ہم اوار اریر۔ اوپارے کہ فلسطینی تیا بیدادی اٹ اوفتا توار ءِ چپ کرفنگ مفک۔ اسرائیل و فلسطین نا جنگ غیر کانودی کوزہ و استصواب رائے نا ءِ، اسرائیلی ظلم فورتھ جنیوا کنونشن نا خلاف ورزی ءِ۔ اوپارے کہ امن نا دوئی کننگ کن جہانی کانفرنس ءِ بٹنگ انگ نا فلسطینی صدر محمود عباس نا خواست انا مخ تفی ءِ کینہ، نن فلسطینی الس نا حق خودارادیت کن برجا جہد نا مخ تفی ءِ برجاتخنہ، پاکستان فلسطین کن تینا سیاسی، سفارتی و اخلاقی مخ تفی ءِ برجاتخک۔