جہانی برادری فلسطین نا ویل انا جامع و ساف ایسری کن گام گیج کے، چیئرمین سینیٹ

اسلام آباد۔ 21 مئی (اے پی پی)چیئرمین سینیٹ محمد صادق سنجرانی پارینے کہ جہانی برادری فلسطین نا ویل ءِ جامع و ساف ایسری کن گام گیج کے، فلسطین نا ویل انا ایسری ڈیہہ و دنیا نا فائدہ ٹی ءِ۔ جمعہ نادے آ چیئرمین سینیٹ سینیٹرآتون اوار فلسطین نا سفارت خانہ غا ہنا و فلسطین نا الس تون یکجہتی نا درشانی ءِ کرے۔ چیئرمین سینیٹ پارے کہ کودک فلسطینی تیا کوزہ گیر اسرائیلی فورس انا جارحیت نا ترندی اٹ مذمت ءِ کینہ۔ کودک فلسطینی تیا اسرائیلی فورس آتا جلہو، غیر کانودی آبادی کاری و کوزہ، فلسطینی تا جبری بے دخلی انسانی حق و جہانیکانود نا بھلا خلاف ورزی ءِ۔ چیئرمین سینیٹ پارے کہ فلسطین نا ویل دے ٹک نیامی ناویل آتا جڑءِ، فلسطین نا ویل انا ایسری اقوام عالم و خاص وڑاٹ ڈیہہ نا امن کن المی ءِ، انسانی حق انا علمبردار تنظیم و اقوام متحدہ نا سلامتی کونسل فلسطین نا ویل ءِ سنجیدہ ہلسا زوت آن زوت گچینی کن گام گیج کیر۔ اوپارے کہ جہانی برادری اخس کہ زوت مننگ کے فلسطین نا ویل انا جامع و ساف ایسری کن گام گیج کے۔ فلسطین نا ویل انا ایسری فلسطینی،م ڈیہہ و دنیا نا فائدہ ٹی ءِ۔ اوپارے کہ نن اینو نادے فلسطینی ایلم تے داکلہو ایتنہ کہ آزمائش نا ہرساہت اٹ مچ آ پاکستانی قوم اوفتے تون سلوک ءِ۔ مچ آ ملک اٹییومیکجہتی فلسطین پبی وڑاٹ اڈتننگ انگ ءِ۔ اوپارے کہ پاکستان بحیثیت قوم جہدآجوئی ٹی فلسطینی تے اسل تنیا ہلیپک و اوفتا حق اکن ہرپلیٹ فارم آ توار بڑزکرسا کیک، غٹ مسلم ملک آتا زمواری ءِ کہ فلسطین نا ویل انا ایسری کن اواری اٹ اسیجائی لائحہ عمل اس اختیار کیر۔ ڈل اٹی ڈپٹی چیئرمین سینیٹ مرزامحمد آفریدی، قائد ایوان سینیٹ ڈاکٹر شہزاد وسیم و ایلوسینیٹرآک اوار ئسر۔ ڈل فلسطینی سفیر تون اوڑدہی ٹی اسرائیلی ظلم انا ترند انگا لوزآتے ٹی مذمت ءِ کرے۔ ڈل اٹی بشخ ہلوک آک اسرائیلی بمباری ٹی مروک آ جانی نسخان و مسجد اقصیٰ غا جلہو نا مذمت ءِ کریرو است ہسونی نا درشانی ءِ کریر۔ چیئرمین سینیٹ پارے کہ نن مشکل نا داساہت اٹ فلسطینی ایلم تتون سلوک اُن، اسرائیلی جارحیت فلسطینی الس نا حوصلہ ءِ شیف شاغنگ کپک۔ یہودی آبادکار یروشلم اٹی قبلہ اول نا بے حرمتی آن پاناد کیر، نیاڑی و چناتتون اوار کودک فلسطینی تیا بمباری لغوری اسے۔ ڈپٹی چیئرمین سینیٹ مرزامحمد آفریدی پارے کہ پاکستان اسرائیلی ظلم انا برخلاف جہانی فورم آ توار بڑز کرسا کیک،یروشلم اٹی فلسطینی تے بے اُراکرسا یہودی آبادکاری بنداوی انسانی حق و جہانی کانود نا خلاف ورزی ءِ۔