پاک چین سفارتی تعلقداری سال دے، صدر مملکت ڈاکٹر عارف علوی و چینی صدر شی جن پنگ نا ہڑتوم آ ملک آتا نیام اٹ ہڑتوم آ کنڈآتا کمکاری ءِ پین سوگو کننگ و سی پیک نا شونداری ءِ بڑزکو آب آ مون آ دننگ نا پڑو

اسلام آباد۔ 21 مئی (اے پی پی) پاکستان و چین نا نیام اٹ ہڑتوم آ کنڈآتا سفارتی تعلقداری نا 70 می سال دے انا وخت آ صدر پاکستان ڈاکٹر عارف علوی و چینی صدر شی جن پنگ ہڑتوم آ ملک آتا نیام اٹ ہڑتوم آ کنڈآتا کمکاری ءِ پین سوگو کننگ و چین پاکستان اقتصادیراہداری (سی پیک) نا شونداری ءِ بڑزکو آب آ مون آ دننگ نا پڑو ءِ کرینو۔ ہڑتوم آ راہشونک تین پہ تینی چھٹی تسنو و تینا تینا حکومت و الس نا کنڈآن اسہ ایلو ءِ مبارکبادی تسر۔ صدر ڈاکٹر عارف علوی تینا چینی ہم منصب نا پن چھٹی ٹی پارے کہ دا تاریخی موقع غا نن پاکستان و چین نا سنگتی ءِ پوسکن آ بڑزی تسکان دننگ و اسیجائی آخبتی نا حامل خڑکی پاک چین کمیونٹی نا ٹہیفنگ نا عزم انا درشانی ءِ کینہ۔ او چینی صدر ءِ گچین جان جوڑی و چین انا الس نا شونہالی و شونداری کن نیک است خواہی تا درشانی ءِ کرے۔ داکان بیدس چین نا صدر شی جن پنگ تینا چھٹیٹی پارے کہ چین و پاکستان ہر آزمائشت آ پورو سلوک آ اسٹریٹجک پارٹنر ءُ ہرا مدام بنداوی فائدہ و بھلا اہمیت نا حامل امور آ اسہ ایلو تون تفینو۔ اوپارے کہ ہڑتوم آ ملک آتا نیام اٹ تین پہ تینی پت و سنگتی 70 سال آن قائم و دائم ءِ ہراہڑتوم آ ملک آتا الس نا غٹ آن نہادی تزویراتی میرات مسنے۔ چینی صدر پارے کہ ساڑی آ سال تیٹی چین و پاکستان نا اسیجائی کوشست آتیان سی پیک نا تفنگ نا بابت شاندار نتیجہ دوئی مسنے ہرا ہڑتوم آ ملک آتا الس تون اوار اوار مچ آ ڈیہہ نا شونہالی نا اہم ءُ محرک اس جوڑ مریک۔ اوپارے کہ کورونا دین انا برخلاف چین و پاکستان خلوص اتون اسہ ایلو نا کمک ءِ کرینو ہراڑآن ہڑتوم آ ملک آتا نیام اٹ سوگو سنگتی ءِ پین سوگوی رسینگانے۔ صدر شی جن پنگ پارے کہ او پاک چین تعلقداری نا شونداری ءِ بھاز اہمیت ایتک۔ اوپارے کہ ای نے تون اواری اٹ ہڑتوم آ ملک آتاالس نا فائدہ غاتے ٹی ہڑتوم آ کنڈآتا اسٹریٹجک رابطہ و ودوک آ کمکاری ءِ پین گہراکننگ، سی پیک نا شونداری نا بڑزکو آب آ مون آ دننگ و اسیجائی آخبت نا حامل پاک چین کمیونٹی نا ٹہیفنگ کن کاریم کننگ نا خواہندار اُٹ۔