وزیر خارجہ مخدوم شاہ محمود قریشی نا اقوام متحدہ نا سیکرٹری جنرل انتونیوگوتریش تون اوڑدہی

نیویارک۔ 21 مئی (اے پی پی) وزیر خارجہ مخدوم شاہ محمود قریشی اقوام متحدہ نا ہیڈکوارٹر نیویارک اٹی اقوام متحدہ نا سیکرٹری جنرل انتونیوگوتریش تون اوڑدہی کرے۔ وزیر خارجہ سیکرٹری جنرل اقوام متحدہ ءِ کودک فلسطینی تیا، زور انا بے رحمانہ کاریم اٹ اتنگ و کودک فلسطینی شاری، نیاڑی و چناتا شہیدی تیا گڑتی آن معلومدار کرے۔ شاہ محمود قریشی پارے کہ سویلی ایشیاٹی آخبتی امن کن کشمیر نا ویل انا اقوام متحدہ سلامتی کونسل نا قرارداد آتے مون آ تخسا ایسری المی ءِ۔ اوپارے کہ فلسطینی تا برخلاف طاقت نا منظم و بے دریغ کاریم اٹ اتنگ نا نتیجہ ٹی 250 آن زیات فلسطینی شہید مسنووخت اس کہ ٹھپی مروک آتا کچ ءِ ہزار آتے ٹی پاننگ انگ ءِ۔ وزیر خارجہ پارے کہ کنا دا دورہ نا مسخت جنرل اسمبلی نا ہلہلہ ئی دیوان اٹی بشخ ہلنگ نا کمک اٹ کودک مظلوم فلسطینی تا حق اٹ توار بڑز کننگ و جہانی برادری نا چکار ءِ انسانی حق انا لتاڑتا کنڈآ کرفنگ ءِ۔ پاکستان، فلسطینی تا حق خودارادیت نا جہد نا مخ تفی ءِ برجاتخنگ کن پرعزم ءِ۔ سیکرٹری جنرل اقوام متحدہ ”سیز فائر“ نا پڑو نا خیرمقدم ءِ کرسا گمان ظاہر کرے کہ داپڑوآن فلسطین نا ویل ءِ مذاکرات نا کمک اٹ ایسر کننگ اٹ کمک رسینگک۔ وزیر خارجہ سیکرٹری جنرل اقوام متحدہ ءِ مقبوضہ جموں و کشمیر اٹی برجا انسانی حق انا بھلا خلاف ورزی، کشمیری راہشون تا غیر کانودی نظربندی و عدالت آن ایڑتر خون نا واقعہ غاتیان معلومدار کرے و پارے کہ سویلی ایشیاٹی آخبتی امن کن کشمیر نا ویل انا اقوام متحدہ سلامتی کونسل نا قراردادآتے مون آ تخسا ایسری المی ءِ۔ پاکستان و بھارت نا نیام اٹ 2003ء نا ”جنگ بندی معاہدہ“ نا پاسداری آ امنائی سلاہ ستاکڑزک۔ شاہ محمود قریشی پارے کہ پاکستان مدام ہمسایہ غاتون پرامن تعلقداری تا مخ تف مسنے۔ مذاکرات کن چاگڑد ءِ سازگار کننگ نا زمواری بھارت آ عائد مریک۔ وزیر خارجہ اقوام متحدہ سلامتی کونسل نا قرارداد آتیا عملدرآمد نا کمک اٹ کشمیر نا ویل انا پرامن و دیرپا ایسری نا گرج آ زور شاغا۔ وزیر خارجہ سیکرٹری جنرل اقوام متحدہ ءِ اوغانستان اٹی امن کن پاکستان نا کوشست آتیان معلومدار کرے۔ ننے گمان ءِ کہ ڈیہہ ٹی امن و سوگوی ءِ پک کننگ و اوغان ویل انا پرامن ایسری کن، غٹ کڑدہ غاک اواری اٹ تولسا جامع سیاسی مذاکرات نا کسر ءِ اختیار کیرہ۔ وزیر خارجہ سیکرٹری جنرل اقوام متحدہ ءِ اسلاموفوبیا نا ودوک آ رجحان آ گڑتی آن معلومدار کرسا اقوام متحدہ نا تعلقدار ادارہ غاتا کنڈآن گچین کڑد ادا کننگ نا گرج آ زور شاغا۔