اسلام آباد۔ 22مارچ (اے پی پی) اکانومی واچ نا صدر ڈاکٹر مرتضیٰ مغل نا پاننگ ئِ کہ حزب اختلاف ملکی شونداری نا کاریم تیٹی بایدے حکومت تون تفے۔ ریڈیو پاکستان تون ہیت وگپ کرسا اوپارے کہ وزیراعظم محمد نواز شریف نا بیان بھاز اہمیت تخک کہ ”نن روڈ آتے جوڑ کرسا کینہ و مخالف آک روڈ آتے کچ کرسا کیرہ“۔ ڈاکٹر مرتضیٰ پارے کہ مسلم لیگ (ن) نا ہر دور اٹی ملکی شونداری نا بے شمار کاریم کننگانے و وزیراعظم پاکستان الس نا شونہالی کن چندی اہم ئُ گام گیج کننگ ئِ، سی پیک و اوڑتون ایب وکیب ایلو شونداری پروجیکٹ آک پاکستان تون اوار ڈیہہ کن گیم چینجر جوڑ مریرہ۔ اوپارے کہ داوخت انا اہم ئُ گرج اسے کہ نن بحیثیت قوم ملکی شونداری نا کنڈآ تینا چکار ئِ تخن و حکومت نا کنڈآن ملکی شونداری کن گام اٹی حکومت تون کمک کے، توانائی پروجیکٹ، روڈ، اسکول و جان جوڑی نا بنجاتا جوڑ جاڑ آن الس اٹی شونداری ناکسرک ملنگرہ و روزگارنا وارخواہی ودی مریک۔ اوپارے کہ حزب اختلاف ئِ ہم بایدے مرے کہ او دھرنہ و برانز نا سیاست ئِ ہلسا ملکی شونداری نا کاریم تیٹی حکومت تون تفے ۔ دیر انا تنکی نا بابت چست کروک آ سوج انا ورندی ئِ ترسا اوپارے کہ بھارت ئِ بایدے مرے کہ او سندھ طاس معاہدہ غا عملدرآمد کے انتئے دیر قدرت نا عطیہ اسے و ہچ ئُ دروشم اسے ٹی پاکستان نا بشخ انا دیر ئِ بند کننگ کپک و ایلو کنڈ ننے ہم تینا گرج آتے پورو کننگ کن بایدے مرے کہ نن پین ڈیم جوڑ جاڑ کین۔
