بیجنگ۔ 10 مئی (اے پی پی) چینی وزارت خارجہ اوغانستان نا دارلحکومت کابل اٹی مسن تا اسہ سیکنڈری اسکول اسے نا خڑک آ بمب جلہو آتیا ڈکھ انا درشانی ءِ کرسا اوتا ترندی اٹ مذمتءِ کرینے۔ چین نا وزارت خارجہ نا ترجمان ہواچھون اینگ جلہو آتے ٹی چینی شاری اسے نا ٹھپی مفننگ ءِ پک کرسا پارے کہ ننے جلہو آتے ٹی زوال کروک آتیا بھاز صدمہ مسنے و پدسلوک آ خاہوت آتون ہڑزخواہی نا درشانی ءِ کینہ۔ ہواچھون اینگ پارینے کہ چین انتہاپسندی و شدت پسندی نا غٹ تر مظاہر نا مدام سختی اٹ مخالفت ءِ کیک، چین دہشت گردی تون مون تننگ و قومی سلامتی و سوگوی نا رکھ اکن تینا کوشست آتے ٹی اوغان حکومت و الس نا پبی مخ تفی ءِ برجاتخک و اوغانستان اٹ زوت امن اٹ کمک کن جہانی برادری اتون اواری اٹ کاریم کننگ کن تیار ءِ۔ ترجمان پارے کہ امریکہ نا اوغانستان آن اناگت فوج انا پورو کشنگ نا ساڑی آ پڑو اٹی مچ آ ملک اٹی دھماکہ خیز جلہو آتا چرجوئی بناکرینے ہراڑآن سیکورٹی نا حالیت خراب و امن و سوگوی تون اوار اوار مخلوق نا جان و سلامتی ءِ ہم خطرہ لاحق مسنے۔ اوپارے کہ چین اوغانستان اٹی درملکی فوج آن خاست کیک کہ او ملک و ڈیہہ ٹی مخلوق نا سیکورٹی ءِ مون آ تخسا زموارنہ وراٹ انخلاکے و اوغان الس ءِ پین انتشار و تکلیف تننگ آن پاناد کے۔
